Operacioni i një dite më parë në Shijak për gjetjen e 49-vjeçarit Jan Prenga të marrë peng prej 11 ditësh ka përfunduar me tre arrestime.
Policia ka arrestuar shtetasit B.H., O.H., dhe E.H. Ndërkohë në kërkim janë shpallur 7 persona të tjerë.
Të hënën, RENEA dhe forcat e ndërhyrjes së shpejtë ushtruan kontrolle në Shijak për zbulimin e vendodhjes së Jan Prengës.
Kontrolle janë ushtruar në një prej komplekseve të zonës ndërsa nga kërkimet nuk është evidentuar ende vendndodhja e 49-vjeçarit. Veç arrestimeve, policia sekuestroi dhe një armë zjarri pa leje.
Kontrollit i janë nënshtruar edhe rrethinat e Shijakut për të zbuluar fatin e 49-vjeçarit, ndërsa nga burimet nuk bëhet e ditur për një rezultat konkret.
Edhe pse nuk ka asnjë informacion për vendndodhjen e tij, policia ka nisur hetimet për të zbuluar motivet e rrëmbimit të tij.
Sipas grupit hetimor për pengmarrjen e 49-vjeçarit dyshohet një sasi prej 16 kg kokainë, e cila nuk është dorëzuar nga i vëllai i cili sipas autoriteteve shqiptare rezulton i përfshirë në trafikun e lëndëve narkotike.
Sipas policisë 49 vjeçari nuk rezulton të jetë person me të kaluar kriminale, apo si person i skeduar me precedentë të mëparshëm.
Jan Prenga u rrëmbye mesditën e 17 Janarit në zonën e Kamzës nga të paktën dy persona ende të paidentifikuar.
Një ditë pas ngjarjes policia gjeti të djegur në rrethinat e Durrësit mjetin tip “Range Rover” me ngjyrë të bardhë, i dyshuar i përdorur nga autorët.
/a.r
