Gjykata e Durrësit ka lënë në burg Mario Musaku, i cili akuzohet se mori peng dhe përdhunoi 30-vjeçaren Ersida Dyrmishi.
Togat e zeza kanë dhënë masën e sigurisë “arrest me burg” për të riun gjatë seancës gjyqësore me dyer të mbyllura, raporton News24.
Seanca gjyqësore u zhvillua nën drejtimin e gjyqtarit Petraq Curri, ndërsa Prokuroria kishte ngritur ndaj tij edhe akuzën e “Dhunës në familje”.
“Erdhi me dëshirën e saj. Nuk e kam marrë forcërisht, po erdhi me dëshirën e saj. Po ta kisha marrë me forcë nuk do ta sillja vetë në komisariat. Kemi njohje me njëri-tjetrin”, ka deklaruar Mario Musaku në dëshminë e parë për policinë.
Akuzat për përdhunim
Ersida Dyrmishi, e cila rezultonte e zhdukur prej 9 ditësh, ka denoncuar policinë e Durrësit Mario Musakun së bashku me bashkëshortin e saj, T. D, 37-vjeç, i cili kishte ngritur alarmin për zhdukjen e bashkëshortes më datë 25.07.2022.
30-vjeçarja ka deklaruar se është mbajtur peng nga Marjus Musaku në një hotel në Durrës dhe sipas denoncimit të saj, i riu e ka përdhunuar nën kërcënimin e një thike dhe duke e kanosur për jetën e familjarëve të saj.
“Specialistët për Hetimin e Krimeve në Komisariatin e Policisë Durrës arrestuan në flagrancë, për veprat penale “Heqja e paligjshme e lirisë”, “Shtrëngimi apo pengimi për të bashkëjetuar ose për të lidhur apo zgjidhur martesë” dhe “Marrëdhënie seksuale me dhunë me të rritura”, shtetasin M. M., 32 vjeç, banues në Lushnjë, i dënuar më parë për veprën penale “Heqja e paligjshme e lirisë”.
Arrestimi i këtij shtetasi u bë pas kallëzimit të shtetasve T. D., 36 vjeç dhe E. D., 30 vjeç (bashkëshortë), banues në Durrës, të cilët mbrëmjen e djeshme kanë denoncuar se shtetasi M. M. i ka hequr lirinë në mënyrë të paligjshme shtetases E. D., duke e mbajtur me forcë për disa ditë në një hotel, e ka detyruar për të bashkëjetuar dhe ka kryer marrëdhënie seksuale me dhunë me të, nën kërcënimin e një thike dhe duke e kanosur për jetën e familjarëve të saj”, njoftoi policia.
Marjus Musaku mbajt peng edhe ish-bashkëshorten në 2018-ën
I riu kishte marrë forcërisht ish-bashkëshorten, e identifikuar në atë kohë me iniciale P.M, 27 vjeçe, në bashkëpunim me një shok të tij.
Marjus Musaku rrëmbeu të renë në shtëpinë e babait të saj në Lushnje dhe ishte ky i fundit që bëri denoncim në polici për zhdukjen e së bijës. Ai e mbajti të fshehur të renë në qytetin e Durrësit, por brenda 24 orëve u gjet nga policia dhe u vendos në pranga.
“Në Komisariatin e Policisë Lushnje ka bërë kallëzim shtetasi F.K, se 2 persona të paidentifikuar i kanë marrë vajzën. Specialistët për Hetimin e Krimeve në Komisariatin e Policisë Lushnje, ndaluan shtetasin: Marjus Musaku, 28 vjeç, banues në Karbunarë, Lushnje. (i dënuar më parë për veprën penale “Dhunë në familje”).
Shtetasi Marjus Musaku, në bashkëpunim me një shtetas tjetër, në fshatin Zhamë, ka marrë forcërisht ish bashkëshorten e tij, shtetasen P.M, 27 vjeçe dhe e mbante peng të fshehur në qytetin e Durrësit. Policia bëri të mundur gjetjen e shtetases P.M dhe kapjen e autorit të dyshuar.
Po punohet për identifikimin e autorit tjetër të dyshuar i cili ka ndihmuar shtetasin Marjus Musaku në kryerjen e kësaj vepre penale”, njoftonte policia në atë kohë.
Mësohet se ish-çifti ishin divorcuar 6 muaj para ngjarjes për shkak se Marjusi e dhunonte sistematikisht të shoqen. Kjo e fundit pasi u kishte thënë problemin prindërve, ata nuk e lejuam më që të jetonte me burrin. Ky ka qenë fundi i martesës së tyre, por i riu nuk e kishte pranuar një gjë të tillë, duke i kërkuar të riktheheshin bashkë dhe kur ajo s’ka pranuar, e ka rrëmbyer forcërisht. Ai u lokalizua nëpërmjet telefonit të tij.
Marjus Musaku u akuzua për veprat penale “Heqja e paligjshme e lirisë” e kryer në bashkëpunim dhe “Dhunë në familje”, të parashikuara nga Nenet 110, 130/a/4, 25 të Kodit Penal./m.j
