Ministri i Mbrojtjes, Niko Peleshi i shoqëruar nga shefi i Shtabit të Përgjithshëm të FA, gjeneralmajor prof. asoc. Bajram Begaj, priti në një takim komandantin e Qendrës së Bashkuar Operacionale Ajrore të NATO, gjeneral lejtnant Fernando De La Cruz Caravaca, i cili po zhvillon një vizitë zyrtare në Shqipëri.
Ministri Peleshi vleresoi gjeneral Caravaca-n dhe stafin e tij për vëzhgimin dhe policimin e hapësirës ajrore të NATO-s dhe në veçanti, si dhe fqinjët, Italinë dhe Greqinë për kontributin e dhënë për policimin e hapësirës ajrore të vendit tonë.
Më tej, ministri i Mbrojtjes e njohu gjeneral Caravaca-n mbi ecurinë e projektit të Bazës Ajrore Kuçovë, si dhe projektet e tjera të modernizimit, sidomos ato që kanë të bëjnë me Forcën Ajrore, me fokus të veçantë në funksionimin e Radarit të Midës.
Nga ana e tij, gjeneral Caravaca e siguroi ministrin Peleshi se personeli i Qendrës së Bashkuar Operacionale Ajrore të NATO-s do të vijojë kryerjen me përkushtim të misionit, për të qenë në lartësinë e sfidave me të cilat përballet NATO.
Gjithashtu, gjeneral Caravaca shprehu gatishmërinë të mirëpresë angazhimin e vendit tonë, që nëpërmjet Radarit të Midës, të kontribuojë në krijimin sa më të plotë të pamjes së përbashkët të hapësirës ajrore të Aleancës.
