Qeveria shqiptare ka miratuar sot marrëveshjen ndërqeveritare me Italinë për ngritjen e sistemit të mbrojtjes civile. Lajmin e dha ministri i Mbrojtjes, Niko Peleshi, sipas të cilit marrëveshja pritet të ratifikohen në janar nga parlamenti shqiptar. Ai theksoi se nga kredia prej 30 milionë eurosh do të financohen qendrat e mbrojtjes civile, sallat operacionale në të gjithë territorin, baza logjistike, blerja e mjeteve zjarrfikëse dhe dy mjete ajrore, për të cilat Peleshi nuk e tha vlerën.
“Parashikon sistemin e mbrojtjes civile dhe është i shtrirë në të gjithë territorin dhe të gjitha nivelet e institucionet. Sistemi merr financim e mbështetje nga kjo kredi prej 30 mln euro. Do të ndërtohet një qendër e mbrojtjes civile në Tiranë dhe më pas në të gjitha prefekturat e vendit. Sallat operacionale të pajisura me kompjutera dhe të lidhura në rrjet. Pranë këtyre 4 qendrave do të ndërtohen dhe struktura për kërkim-shpëtimin, për zjarr, përmbytje, tërmet e orteqe. Parashikohet blerja e automjeteve zjarrfikës dhe logjistika për përmbytje, aksidentet rrugore dhe kërkim-shpëtim. Pjesë e kredisë është parashikuar edhe blerja e dy mjeteve ajrore sidomos për zjarret, për periudhën e vështirë të verës. Kamp trajnimi për zjarrfikësit, forcat emergjente dhe forcat e armatosura dhe me laboratorë simulimi. Me këtë financim, kompletojmë të gjithë sistemin e mbrojtjes civile në vendin tonë. Nuk them vlerën për mjetet ajrore, por brenda kësaj kredie mund të akomodojnë këto mjete”.
Sipas Peleshit, sfidë mbetet mirëmbajtja e helikopterëve, pasi nuk mund të kryhet brenda vendit. Ai njoftoi gjithashtu prishjen e kontratës me Italinë për shërbimin e mjeteve ajrore dhe kalimin e saj agjencisë së NATO-s.
“Sfida jonë është që kur investohet për mjete ajrore të reja është mirëmbajtja. Brenda vendit nuk kemi kompani të specializuara për helikopterët. Na duhet të blejmë këtë shërbim jashtë dhe kostot e transportit janë të mëdha dhe jo të gjitha kontratat performojnë si duhet dhe futemi në kalvare vonesash si rasti i helikopterit në Itali që u bënë 2 vjet dhe ajo kontratë nuk e performon dhe jemi në ndërprerje të kontratës me Italinë. Kemi filluar bisedimet me agjencinë e NATO-s sapo helikopteri të çlirohet nga kontrata me Italinë do të dërgohet në agjencinë e NATO-s për t’u kryer shërbimi nga ana e tyre”.
/a.r
