E majta duhet të dalë së bashku në zgjedhjet e ardhshme dhe koalicioni PS-LSI duhet t’i bashkohen edhe parti të tjera.
Deklarata bëhet nga numri dy i qeverisë Niko Peleshi, i cili deklaroi nga Pogradeci se kur është bashkë, e majta është e pakthyeshme.
Peleshi: Nuk shikoj arsye për të shkuar të ndarë dhe të përçarë. E majta ka nevojë të bashkohet. Nuk mjafton vetëm një aleancë midis PS-së dhe LSI-së, por duhen edhe parti të tjera. Koalicioni funksionon, funksionon mirë dhe nuk shoh asnjë arsye që të mos vazhdojë. E majta e ka provuar përçarjen, e ka provuar edhe sesa e pathyeshme bëhet nqs bashkohet. Këtë e ka provuar edhe PS, edhe LSI.
Në secilën zgjedhje, secila forcë politike synon të marrë sa më shumë vota dhe unë do doja që PS të rriste numrin e deputetëve, por padyshim koalicioni është i dobishëm ndaj ka ardhur edhe ftesa e Ramës në asamble. S’kemi asnjë ngutje, ka edhe 6 muaj nga zgjedhjet, s’ka ngut e stres e ankth brenda të majtës.
Edhe kryeministri Edi Rama rreth një javë më parë në mbledhjen e Asamblesë Kombëtare të Partisë Socialiste, deklaroi se koalicioni me LSI-në është strategjik./oranews/a.k
