Nga dita e nesërme, pedagogët do të kthehen në auditore por nuk do të ndalin protestat. Ata kanë vendosur që të mos pengojnë më zhvillimin e procesit mësimor në Fakultete, por do të vijojnë protestat dhe grevat derisa të plotësohen kërkesat e parashtruara prej më shumë se 3 javësh.
Gjithashtu njoftojnë se do të zhvllojnë protestën e radhës Kombëtare, të martën në orën 11:00 përpara Korpsuit Qendror të UPT. Ky vendim erdhi pasi kërkuan garanci nga Presidenti për të hyrë në grevë urie, por nuk morën një përgjigje.
Në reagimin e kësaj të diele, Sindikata sqaron se pedagogët iu drejtuan qeverisë për mbështetje financiare, por heshtja solli protestat dhe bojkotin mësimor. Në një kohë kur qeveria ka vendosur mbështetje me 15%, pedagogët kërkojnë më shumë. Megjithatë theksojnë se ndodhen në situatë kritike, ndaj kanë vendosur të tërhiqen nga bojkoti për t’u kthyer sërish aty ku duhet të jenë, në auditore.
“Pezullimin e bojkotit dhe rinisjen e procesit mësimor, për të përmbushur detyrimin tonë akademik, atë të përçimit të dijes tek studentët;
Vazhdimin e protestës me të gjitha format demokratike dhe institucionale, përfshirë protestat kombëtare universitare periodike, deri në vlerësimin dhe zgjidhjen e kërkesave të parashtruara;
Të gjitha llojet e protestave, përfshirë grevat e çdo lloji, vazhdojnë të qëndrojnë si mundësi finale për realizimin e të gjitha kërkesave të Peticionit dhe më gjerë!
Të zhvillojë Protestën Kombëtare Universitare të radhës, ditën e Martë, datë 8 Nëntor 2022, ora 11.00, përpara Korpusit Qëndror të UPT” – thuhet në deklaratën e SPUSH.
Më 5 tetor Qeveria ka vendosur që të rrisë me 15% pagën e pedagogëve, pas protestave të këtyre të fundit. Nga ku 7% do të mbulohet nga buxheti i shtetit dhe 8% do të mbulohet nga vetë bordi i administrimit. Nga ana tjetër pedagogët janë shprehur se kjo rritje është e pa mjaftueshme dhe nuk i përgjigjet kërkesave dhe nevojave të tyre.
Kërkesat e kryesore të pedagogëve
Rritja e pagave për pedagogët dhe stafin ndihmës
-Rritja e financimit për kërkimin shkencor
-Rivendosja e shtesave mbi pagë për ‘Dëshmëri shëndeti në punë’
-Rritja e shtesës mbi pagën për vjetërsinë në punë
-Rritja e pagesës së orëve të ngarkesës suplementare
-Rivlerësimi i orës mësimore pasi ka zbritje prej 50% të pagesës së orës mësimore si rezultat i mosfierencimit të orës mësimore të leksionit.
-Rishikimin e tatimit prej 23% mbi pagesën e ngarkesës suplementare
-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”.
-Të bëhet transparencë mbi buxhetin dhe të ardhurat e universitetet publike.
/s.f
