PE voton rezolutën për Shqipërinë, Kukan: Mbështesim misionin ndërkombëtar për zbatimin e Reformës në Drejtësi

Rezoluta për Shqipërinë u miratua me 546 vota pro, dhe 62 abstenime. Siç u theksua edhe më parë në projekt-rezolutë është kërkuar zbatimi i reformës në drejtësi, progres në luftën kundër krimit, korrupsionit si dhe mbajtja e zgjedhjeve të lira dhe të ndershme të cilat do të mbahen në qershor të 2017. Të gjitha këto pika do të mund të provojnë se janë çelësi që vendi ynë të nisë procesin e anëtarësimit në BE dhe negociatat të nisin sa më shpejt.

Eurodeputetët kanë diskutuar rreth 45 pikave në përmbajtjen e projekt-rezolutës, ku më thelbësoret që kushtëzojnë propozimin e një date për hapjen e negociatave të anëtarësimit, mbeten zbatimi praktik i Reformës në Drejtësi dhe mbajtja e zgjedhjeve të lira më 18 qershor.  Kryefjalë mbetet realizimi i shpejtë i vettingu-t, duke rivlerësuar të gjithë gjyqtarët dhe prokurorët aktualë shqiptare.

Nga institucionet europiane kërkohet zbatimi i plotë i ligjit të dekriminalizimit, kërkohet transparenca dhe auditi për financimin e partive politike. Eurodeputetët mbeten të shqetësuar për drejtësi selektive, korrupsionin, dhe ndërhyrjen politike në hetimet dhe çështjet gjyqësore.

Theksohet se dialogu mes mazhorancës dhe opozitës është thelbësor. Në referencë me zgjedhjet e ardhshme parlamentare inkurajohen autoritetet shqiptare të marrin masa për të lehtesuar votimin e emigranteve. Raportuesi Knut Fleckenstein është shprehur se që nga vera e vitit 2014 Shqipëria ka qenë kandidate për anëtarësim në BE dhe që atëherë ajo ka bërë progres të vazhdueshëm.

Miratimi i reformës gjyqësore të gjerë është një moment historik në rrugën e Shqipërisë drejt anëtarësimit në BE. Më pak korrupsion, më pak krim i organizuar, është i rëndësishëm për jetën e përditshme në Shqipëri.

Më herët, edhe eurokomisioneri Eduard Kukan ka komentuar raportin e diskutuar Fleckenstein për Shqipërinë.
“Jam i gëzuar të shikoj progresin e vazhdueshëm të Shqipërisë në rrugën drejt integrimit europian dhe shpresoj që kjo të vazhdojë për të mundësuar dhënien e një datë për hapjen e negociatave së shpejti. Konsensusi politik që çoi në miratimin e reformës në drejtësi ishte një hap i rëndësishëm në këtë proces. Besoj se zbatimi i saj do të forcojë besimin e qytetarëve te drejtësia dhe shteti ligjor. Ne e mbështesim këtë proces dhe misionin vëzhgues për zbatimin e saj”, shkruan Kukan, i cili ndër të tjera nënvizon se dialogu i vazhdueshëm politik është jetik për të ardhmen e vendit.