Partia Demokratike e Kosovës, Dega në Prishtinë, ka kritikuar qeverisjen komunale të Prishtinës, e cila, përveç një ekspozite me fotografi të vjetra të kryeqytetit, të cilat nuk janë parë më parë, nuk ka organizuar asnjë aktivitet tjetër i cili do të shënonte ditën e çlirimit të kryeqytetit.
Duke kujtuar se bëhen 16 vjet kur njësitet e UÇK-së hynë në kryeqytet “duke i luftuar forcat ushtarake, policore e paramilitare serbe”, se sot bëhen 17 vjet kur “qytetarët e Prishtinës e përjetuan lirinë dhe shpresën për jetë”, se sot Prishtina dhe qytetarët e saj “shënojnë 17 vjetorin e jetës së lirë, në shtetin e lirë e të pavarur”, dhe se Prishtina dhe Kosova “shënojnë shtatëmbëdhjetë vjetorin e nënshkrimit të Marrëveshjes së Kumanovës dhe kapitullimit të Serbisë në Kosovë”, PDK e Prishtinës, në një reagim dërguar mediave, thotë se sot, “qytetarët e lirë në, Prishtinën e lirë, nuk e jetuan festën e merituar”.
“Dëshmorëve të rënë nuk iu bë nderim. Nuk pati as lule as vizita e përkulje pranë tyre, as kujdes e kujtim nga ata që sot e drejtojnë qytetin për të cilin ranë dëshmorët tanë! E rëndë ta shohësh Prishtinën sot stisur në rutinën e vikendit të kësaj fillimvere pa festë, pa flamuj, pa program kulturor -pa asgjë”, thotë PDK, Dega në Prishtinë në reagimin e saj, raporton Koha.net.
Më tej, kjo parti opozitare në Kuvendin Komunal të Prishtinës, pyet se “ku janë udhëheqësit zëfuqishëm të drejtuesve të Prishtinës?”.
“Ku është zotimi i tyre deri në piskëllimë se i vlerësojnë e respektojnë dëshmorët, se kujdesen për shtet e sovranitet dhe punojnë për bashkim? A është kjo tashmë retorikë terse e shpërfaqur edhe në këtë 17 vjetor”, pyet PDK, Dega në Prishtinë.
“Ndoshta i pari i Prishtinës dhe suita e tij janë larg, dikush në Francë e dikush më në lindje në vikende qejfi e relaksi! Sido që të jetë, një është e sigurt, se Prishtina në të gjitha stinët dhe kohët e saj ka pasur e do të ketë njerëz që e duan e respektojnë dhe mburren me të. Urime Prishtinë. Prishtinasit i kanë nderuar e do t’i nderojnë përjetë dëshmorët dhe heronjtë tanë. Sot për ta veç një fjalë: Flini të qetë…”, ka përfunduar reagimin e saj, Dega e PDK-së në Prishtinë. (b.an)
