Partia Demokratike ka vijuar edhe ditën e sotme konferencat për shtyp ku akuzon Ministrin e Brendshëm Saimir Tahiri. Ka qenë Kryetari i Grupit Parlamentar të PD, Edi Paloka, i cili përsëriti akuzat ndaj Tahirit ku sipas tij ai është i lidhur me trafikun e drogës.
Sipas Palokës, “Tahiri ka ndërvepruar me Habilajt për trafikun e drogës” dhe këtë e tregon sistemi TIMS.
“Tahiri ka ndërvepruar me Habilajt për trafikun e drogës dhe ka mashtruar për makinën e tij, që është kthyer në simbolin e trafikut të drogës. Ministri jep deklarim të rremë: makina është e tija. Ai që paguhet për të zbatuar rendin dhe luftuar trafiqet, shkel ligjin duke bërë deklarim të rremë. Ky akt po sjell revoltë te qytetarët. Të gjithë po e shikojnë paligjshmërinë dhe arrogancën e qeverisë. Kryeministri Edi Rama tregon se ka zgjedhur krimin dhe jo qytetarët”, shtoi kreu i Grupit Parlamentar të PD-së.
