Ervin Salianji i Partisë Demokratike, që publikoi të hënën foto në një parcelë me kanabis në zonën e Tepelenës, denoncoi policinë për mosveprim dhe mbrojtje të trafikut të drogës.
“Edhe pse i treguam në vend parcelat me kanabis, asnjë masë, asnjë operacion. Arsyeja dihet, ky është biznesi qeveritar i Edi Ramës dhe Saimir Tahirit. Ai bëhet nën mbikëqyrjen e shefave të policisë, që janë sekserët e 30 përqindëshit për çdo parcelë”, tha Salianji.
Por Partia Demokratike e përshkallëzoi përgjegjësinë e kryeministrit, kur e lidhi mbjelljen e kanabisit me sigurinë kombëtare.
“Edi Rama e di se narkotrafikantët tashmë po bashkëpunojnë edhe me celulat e terroristëve, që duan të financojnë aktivitetin e tyre me paratë e drogës. Por, me veprimet dhe mosveprimet e tij, inkurajon në fakt këtë gjendje të paprecedentë kriminaliteti dhe kërcënimi të stabilitetit dhe sigurisë kombëtare”, tha më tej ai.
Kjo është një nga akuzat më të rënda të Partisë Demokratike për kryeministrin Rama dhe u parapri që të martën nga kreu i opozitës, që lidhi domosdoshmërinë e qeverisë teknike edhe me sigurinë kombëtare.
“Partia Demokratike ka marrë raportime serioze për mundësinë e aktivitetit terrorist, të personave me rrezikshmëri të lartë, në zona të caktuara të kultivimit të drogës. Informacion, të cilin po ia përcjellim edhe partnerëve tanë”, deklaroi Lulzim Basha.
*** Ja deklarata e plotë
Partia Demokratike ka denoncuar prej muajsh me prova dhe fakte kthimin e Shqipërisë nga Edi Rama në Kolumbinë e Europës.
Prej 4 ditësh kemi denoncuar me video, foto, prova të dorës së pare, luginën e drogës në Vlorë.
Prej dy ditësh kemi denoncuar me video, foto e prova hambarin e drogës në vendlindjen e Tahirit të Ramës, prej nga vijnë dhe pjesa më e madhe e krerëve të Policisë.
Edhe pse i treguam ne vend parcelat e me kanabis, asnjë mase, asnjë operacion. Arsyeja dihet, ky është biznesi qeveritar i Edi Ramës dhe Sajmir Tahirit. Ai bëhet nën mbikqyrjen e shefave të policisë, që janë sekserët e 30 përqindëshit për cdo parcelë.
Këto prova e dëshmi të siguruara e të publikuara nga Partia Demokratike, konfirmojnë atë që di cdo shqiptar: Pa lejen e Edi Ramës, askush nuk mund te bëjë një biznes të tillë kriminal. Ky biznes kërkon garanci e mbrojtje që në fazën e parë, kërkon garanci të vazhdueshme, kërkon që ligji të mos funksionojë, që policia të mos funksionojë.
Prej 3 vitesh këtë pushtet në Shqipëri, që ndalon ligjin të funksionojë, që ndalon policinë të funksionojë e ka pasur dhe e ka ushtruar Edi Rama.
Ndaj Edi Rama është përgjegjës për çdo rrënjë kanabis që mbillet e trafikohet në territorin e vendit, sepse ai e lejon, ai e bekon, skemën e 30 përqindëshit, taksa e famshme për miliona eurot e përmuajshme të këtij krimi që po shkatërron vendin, për të pasuruar trafikantët e qeveritarët.
Edi Rama është përgjegjës për krimet që po ndodhin çdo ditë për shkak të këtij biznesi kriminal. Si rasti i një jave më parë, që policia u mundua ta fshehë, ku 28 vjecari Elidian Pashai ra viktime e një tafikanti të njohur droge që kontrollonte arat me kanabis në këtë zonë.
Edi Rama është përgjegjës për viktimat e përditshme në aksidentet rrugore, pasi policia e tij është duke ruajtur drogën nëpër parcela.
Edi Rama është përgjegjës për shfrytëzimin e fshatarëvë të varfër me 10 – 20 mije lekë të vjetra, të cilët detyrohen të shërbejnë në parcelat me drogë për shkak te mjerimit te tyre, duke mundësuar kështu miliona euro për trafikantet e qeveritarët.
Edi Rama është përgjegjës për rrënimin e bujqësisë shqiptare nën presionin e narkokultivuesve. Edi Rama është përgjegjës për rrënimin e ekonomisë shqiptare dhe biznesit të ndershëm që tani duhet të konkurrojnë me ekonominë e drogës.
Edi Rama e di se narkotrafikantët tashmë po bashkëpunojnë edhe me celulat e terroristëve që duan të financojnë aktivitetin e tyre me paratë e drogës. Por me veprimet dhe mosveprimet e tij, inkurajon në fakt këtë gjendje të paprecedentë kriminaliteti dhe kërcënimi të stabilitetit dhe sigurisë kombëtare.
Shqiptarët kanë detyrimin ta largojnë një ore e me parë këtë përgjegjës të pasigurisë dhe rrënimit të ekonomisë së tyre. Ajo ditë po vjen. Shqipëria do të jetë më mirë pa Edi Ramën.
