Partia Demokratike përmes nënkryetari Edmond Spaho ka denoncuar një tender të qeverisë për të blerë 29 makina lukzose për ministrat e kabinetit, në kushtet kur sipas opozitës populli vuan një krizë të thellë ekonomike dhe varfëria është e kudondodhur. Deputeti Spaho, duke treguar disa foto të makinave luksose të ministrave tha se, teksa njerëzit vuajnë për bukë, qeveritarët vërdallisen me automjete qindra mijëra euroshe.
“Në kohën kur varfëria e ka kaluar kufirin, kur ekonomia është në krizë të thellë, kur papunësia shtohet dhe qytetarët janë çdo ditë e më të pashpresë, Edi Rama mendon se ka ardhur koha që Ilir Beqja, Saimir Tahiri, Damian Gjiknuri e soji i tyre në kabinet, të kenë makina edhe më luksoze për të ndenjurat e tyre të krimbura në korrupsion e krim. 29 Jaguar, makina e fjalës së fundit, janë porositur nga Edi Rama për të dhe për ministrat. Ky është shpërblimi që ka Edi Rama për ministrat e tij që e kanë kryer shumë mirë deri tani misionin e vjedhjes, zhvatjes e plaçkitjes së fondeve kudo, në çdo mundësi që u është dhënë”, deklaroi Spaho.
Spaho bëri thirrje që qytetarët të ngrihen në këmbë dhe të kundërshtojnë ata që ai i cilësoi si banditë të korruptuar.
“Kjo është qeveria që kemi. Ky është kryeministri që kemi. Nuk pret më koha. Duhet të ngrihemi e t’i ndalim këta banditë të korruptuar bashkë me Jaguarët e tyre”- përfundoi nënkryetari i PD.
