Partia Demokratike ka vijuar akuzat për mënyrën sesi po zbatohet reforma në drejtësi, dhe konkretisht procesi i vettingut. Përmes një deklarate për mediat, zëdhënësja e PD, Ina Zhupa ka denoncuar konfirmimin në detyrë të gjyqtares së Apelit në Vlorë, Brikena Ukperaj, duke u ndalur tek “3 pikat e errëta të vendimit të organeve të vettingut”.
· Mosjustifikimi dhe mungesa e një hetimi të thelluar nga organet e vettingut për një shtëpi në emër të bashkëshortit;
· Problemet për blerjen e një automjeti, për të cilin organet e vettingut nuk hetuan me vëmendje, si dhe
· Mosverifikimi i plotë i ankimit të familjes Bodo kundër vendimit të dyshimtë për aferën e 200 hektarëve tokë në Karaburun, që favorizoi deputetin socialist Fidel Ylli;
Këto janë tre pikat e errëta të vendimit të organeve të vettingut, që po mban në sistemin e drejtësisë gjyqtarë të korruptuar.
Sipas PD, vettingu po vepron me dy standarde. Duke denoncuar “pasuritë e pajustifikuara të gjyqtares Ukperaj”, zëdhënësja e demokratëve tha se këto prova “zbërthejnë skemën e Ramës për kapjen e Drejtësisë”.
Zhupa tha se reforma në drejtësi është një farsë politike.
“Partia Demokratike shpreh edhe njëherë shqetësimin se procesi i vettingut, i diktuar nga Edi Rama, po mban në sistem gjyqtarë e prokurorë të korruptuar, në kundërshtim me pritshmëritë e qytetarëve shqiptarë”, tha ajo.
a.ç
