Partia Demokratike ka rinisur sulmet ndaj ambasadorëve të Perëndimit në Shqipëri.
I ftuar në emisionin e mëngjesit “7 pa 5” në Vizion Plus, Edi Paloka ka folur për zgjedhjen e kryeprokurorit të ri.
Ai ka hedhur aludime se qeveria po manipulon ambasadorët.
Duke folur për mundësinë që Rama të blejë votat në Parlament, Paloka ka thënë se veçoria e kryeministrit është që të paguajë në të gjitha monedhat, duke nënkuptuar korruptimin e diplomatëve të huaj.
“Nuk ka nevojë Rama të bëjë kërkesë për konsensus.
Nëse do të zgjedhë një kryeprokuror, të zbatojë Kushtetutën.
Më pas mund të ulemi që të zgjedhim kryeprokurorin e përhershëm jo me 84 vota, por edhe me më shumë”, tha Paloka.
Ja dialogu i zhvilluar në studio:
Edi Paloka: Mund të blejë një e dy langaraqë, por ta harrojë se bën 85 vota në Parlament. Ju keni të drejtë, se ky është imazhi i Edi Ramës. Edi Rama paguan me të gjitha monedhat. Mund të paguajë në lek, euro, edhe në dollarë…
Gazetari: Po ambasadori amerikan dhe ajo e BE-së kanë thënë se…
Edi Paloka: Ore, a dëgjoni se çfarë thashë? Edi Rama paguan në të gjitha monedhat.
Nuk e ka problem. Ju mendoni se korrupsioni ka lindur në Shqipëri?
Edi Paloka ka akuzuar edhe shoqërinë civile, duke thënë se po përdoret nga Edi Rama duke mos çuar emrat për në Këshillin e Lartë të Prokurorisë e duke krijuar këtë vakuum ligjor.
“Si veprohet me kryeprokurorin kur KLP nuk është ngritur ende? Duhet gjetur një zgjidhje tjetër. Nuk mund ta gjejë Ulsiu zgjidhjen.
Nuk është ndërprerë mandati. KLP nuk është ngritur sepse nuk do Edi Rama, ai do një kryeprokuror që të mbyllë dosjet. Prokurori ka gjithçka në dorë.
I ka dhënë urdhër shoqërisë civile që të mos dorëzojë propozimet. E mbani mend shoqërinë civile që bënte protesta, që po e vononte PD reformën? Sot ajo shoqëri nuk çon kandidatë për në KLP”, është shprehur Edi Paloka./a.m.
