Nga Artur Ajazi
Prej vitit 2013 deri sot, kemi parë vazhdimisht një parti që përpëlitet mes realitetit dhe absurdit. Prej 13 vitesh, partia e Idealeve të Dhjetorit, e grabitur pabesisht nga ata që sot, nuk pranojnë të largohen prej saj, gjendet në kolaps. Ata që e themeluan, ata që vunë “tullat dhe themelet” e saj, sot janë në emigracion, u rrahën, u denigruan, u poshtëruan, nga i vetmi njeri, që sot hiqet si “krijuesi PD”.
Ajo parti nuk bën rrotacion, nuk prodhon politikë, nuk nxjerr liderë, nuk pranon mendimin ndryshe, nuk bën kurrë zgjedhje të lira dhe të ndershme brënda saj. Ajo parti u grabit nga njeriu që ka qeverisur fatkeqesisht dy here vendin, dhe që ironikisht po kërkon rikthimin në pushtet. Partia Demokratike, forca e parë politike që u përball me ish-PPSH, dhe që fitoi denjësisht zgjedhjet në 22 Mars 1992 duke ardhur në pushtet, sot gjendet në duart e një njeriu, të një kaste dhe të një klani.
Gjendet në duart e Berishës, duke mos qasur asnjë ti afrohet dhe ti bëjë oponencë atij. Si ka mundësi që një parti e pretenduar “demokratike, e djathtë dhe euroatlantike”, të jetë kaq e pafuqishme të krijojë shpresën, besimin dhe frymën ndryshe tek shqiptarët ? Berisha akuzon, akuzon dhe akuzon vetëm PS, dikur Fatos Nanon dhe sot Edi Ramën. Ai askund tjetër nuk e sheh “defektin dhe pengesën” për të ardhur në pushtet apo për tu rinovuar, veçse tek Edi Rama. E fajëson Edi Ramën për 21 Janarin, për Gerdecin, për humbjet seriale të zgjedhjeve, e fajëson Ramën për “shkatërrimin e opozitës, për non-grata”, e shumë të tjera, pa asnjë lidhje me kryeministrin socialist.
Ka 28 vjet që nuk njeh asnjë humbje elektorale, ka 35 vjet që nuk bën zgjedhje të lira dhe demokratike brënda partisë tij, dhe mbetet kryetar i përjetshëm i PD. Por, si mund të fajësosh Ramën apo dhe këdo tjetër për “shkatërrimin e opozitës”, kur ke 3 dekada që nuk njeh humbjen në zgjedhje, kur ke 3 dekada që nuk kryen analiza serioze të humbjeve dhe rrotacion brënda partisë tënde, kur ke 3 dekada që flak nga partia çdo zë dhe mendim ndryshe, kur ke 3 dekada që thua “po më vjedhin votat”, kur edhe brënda vetë PD, nuk arrin të marrësh votat e duhura për të mbajtur postin e kryetarit partisë ? Asgjë nuk mbahet me pahir z. Berisha, as pushteti dhe as partia, ashtu siç keni tentuar deri sot të veproni ju.
Në fund të fundit, nuk po bëni asgjë më shumë se, po rrënoni nga themelet Partinë Demokratike, duke qenë për 35 vjet, përgjegjësi kryesor për çdo zhvillim brënda saj, pa sjellë asnjë ndryshim cilësor në politikbërjen e asaj force politike. Mjafton të kujtojmë se në 22 Mars 1992, Partinë Demokratike e votoi 75 per qind e shqiptarëve. Kaq, mjafton të thuash se “degradimi i saj aktual ka vetëm një autorësi, njeriun që e drejton nga humbja në humbje, dhe që nuk pranon as humbjen dhe as rrotacionin, brenda lidershipit të saj aktual”. Nuk e di pse, por PD më duket si seksioni i asaj partie në Qerret.
