Partia Demokratike nuk ndalet me akuzat në drejtim të kryeminsitrit rama për inkriminimin e administratës.
Pas deklaratave të kryeministrit Edi Rama gjatë Forumit të Gruas Socialiste se në PS-së nuk ka kriminelë, por është rritur numri i grave dhe vajzave reagoi edhe Partia Demokratike.
Përmes një deklarate zyrtare PD i kërkon Ramës që të ulet dhe të kërkojë ndjesë ndaj shqiptarëve për personat që ka futur në parlament.
Ja deklarata e PD:
Për Edi Ramën, tipat si: tutorë, përdhunues, trafikantë droge, rrëmbyes personash, vrasës, nuk janë kriminelë.
Edhe sot, në një mbledhje me gratë socialiste ai nuk pati zor të deklaronte se kriminelë nuk ka në partinë e tij.
E thotë ditën kur çdo shqiptar, dhe veçanërisht çdo grua, vajzë, nënë, pret nga Edi Rama një ndjesë, një falje, pse ai mban në pushtet, vazhdon ta ushtrojë pushtetin me përdhunues e tutorë.
Nuk kërkon ndjesë, nuk u zë as emrin në gojë. Ndërkohë që Rroshi e Bushi, Prenga e Ndoka, e dhjetëra e qindra si këta që gjenden në krah të Edi Ramës, janë plagët e realitetit sot.
Në atë sallë ku ishin mbledhur gratë socialiste, mungojnë dy zonja nga Lezha. Mungojnë sepse u larguan me dhunë nga lista e deputetëve për t’i hapur rrugën Arben Ndokës, i dënuar me 7 vite burg në Itali për prostitucion dhe rrëmbim personi.
Mirëpo kjo nuk bën më përshtypje në forumet e Edi Ramës, kaq shumë e ka vënë mbi parti rrasën e inkriminimit, e ka kthyer në model, në trend, në orientim.
Në vend se gratë të kërkonin llogari për dy zonjat nga Lezha që janë përjashtuar për t’i lënë vendin trafikantit të femrave, në vend se t’i thonin ku e ke vendimin për shkarkimin e Rroshit të dënuar në Itali për përdhunim në grup, ato ulin kokën dhe dëgjojnë kakarisjen e fëlliqur të atij, pikërisht të atij që e mbushi partinë me kriminelë.
Jo vetëm partinë po zyrat publike, institucionet, parlamentin.
Ku janë kriminelët? Në çdo zyrë të pushtetit të Edi Ramës. Nuk ka shqiptar që nuk e di këtë, nuk ka shqiptar që nuk i njeh. Vetëm një e mohon. Autori, krijuesi, ai që i qëmtoi me dorën e tij, i mori për të ardhur në pushtet e për të ndarë sot me ta pushtetin. Edi Rama ka zgjedhur të sfidojë shoqërinë, ligjin, dekriminalizimin, çdo normë morali në vend, duke afruar me shpejtësi fundin e tij, e bashkë me të të tutorëve, vrasësve, përdhunuesve, trafikantëve të drogës.
