Deputeti demokrat Arben Ristani ka reaguar sot për atë që PD e ka cilësuar si një skandal pas vizitës së sekretarit Kerry në Tiranë.
Në një foto të publikuar, PD pretendon se ish-deputeti Arben Ndoka ka prezantuar Prefektin e ri të Qarku Lezhë, pas largimit të Altin Jakut.
“Departamenti amerikan i shtetit e cilësoi të papranueshme që Arben Ndoka, i dënuar në Itali për trafik prostitucioni dhe rrëmbim personi, të ishte pjesë e parlamentit. Sekretari Kerry, pasi e vlerësoi dje në Tiranë procesin e dekriminalizimit, e veçoi atë si sukses dhe model që duhet ndjekur. E megjithatë, ja ku është i zgjedhuri i Edi Ramës, i besuari i tij në Lezhë, duke prezantuar Prefektin e Qarkut. Ja ku është i dënuari që, pas denoncimeve të opozitës, pas qëndrimeve të partnerëve ndërkombëtarë, dhe pasi ligji i dekriminalizimit e nxorri jashtë parlamentit, sot, me bekimin e Edi Ramës, qeveris Lezhën, bën emërime, shkarkime, tenderime. Vendos për çdo gjë.” – tha Ristani.
Sipas tij, Edi Rama po sfidon hapur dekriminalizimin dhe mesazhin e John Kerry.
“Ende pa u mbushur 24 orë nga mesazhi i sekretarit Kerry për dekriminalizimin, Edi Rama po konfirmohet si promotor dhe protektor i krimit në politikë” – përfundoi Ristani.
