Deputeti Genc Pollo, duke akuzuar qeverinë se po kompromenton mediat, ka transmetuar para gazetarëve të pranishëm në selinë blu, videon e oficerit të antidrogës Dritan Zagani.
Ky i fundit ka deklaruar se tre vëllezër që drejtojnë trafikun e drogës janë të afërm të ministrit Tahiri.
“Një nga dëshmitë më tronditëse të kohëve të fundit, të oficerit të lartë të anti-drogës, Zagani, që flet për lidhjet e Ministrit të Brendshëm me bandat e trafikut të hashashit, heroinës e kokainës, u ndërpre me dhunë nga qeveria. Oficeri i Lartë i anti-drogës, që ka marrë vlerësime gjatë punës së tij nga partnerët e vendeve fqinje, ka konstatuar banda që transportonin tonelata me drogë, që ishin të mbrojtura, të paprekshme, sepse kishin lidhje me Saimir Tahirin” – ka thënë Pollo.
Sipas tij, ishin të afërm të Tahirit dhe përdornin edhe mjetet e tij private.
Kjo pjesë thelbësore e dëshmisë së oficerit u ndërpre. Këto kërcënime, tha Pollo, kanë ardhur nga Edi Rama e Saimir Tahiri.
Autori i intervistës e botoi më pas të plotë në rrjetet sociale intervistën e dhënë për gazetarin Basir Çollaku. “Ne premtuam se do ta bënim publike këtë pjesë të intervistës, dhe po e shfaqim tani për publikun” – tha Pollo.
