Ende pa u tharë boja e ligjit të miratuar me konsensus mes pozitës dhe opozitës për ligjin e “Dekriminalizimit”, PD-ja ka depozituar sot në Kuvend një nisëm të re ligjore që ka të bëjë me këtë çështje, por edhe me komisionet parlamentare hetimore. Në thelb nisma e PD-së duket se merr shkas më shumë nga ngjarje të ditës sesa plotëson tërësinë e kuadrit ligjor të ligjit. Propozimi për dekriminalizimin, parashikon përjashtimin nga politika për funksionarët dhe të zgjedhurit kur ata arrestohen në kushtet e flagrancës të krimit kundër jetës dhe shëndetit. Kërkesa e re e PD-së heq prezumimin e pafajësis një normë kjo kushtetuese për çdo individ, pasi, po sipas këtyre ndryshimeve, personi mund të ketë të drejtë të kandidojë vetëm atëhere kur gjykatat janë shprehur me vendim të formës së prerë për pafajësinë e tij. “Në cdo rast, pezullimi mbaron kur personi deklarohet i pafajshëm, me vendim gjyqësor të formës së prerë.”, thuhet në propozimet e reja të PD-së. .
