Sekretari për “Sipërmarrjen e Lirë” në PD, Besart Kadia, është i bindur se bashkëpunimi me CDU-në e Kancelares Angela Merkel do t’i shërbejë opozitës për t’u dhënë një alternativë të vërtetë ekonomike shqiptarëve në zgjedhjet e vitit 2017.
Kadia i cili së fundmi ka marrë edhe përgjegjësitë e sekretariatit për “Sipërmarrjen e lirë”, ka qenë drejtor ekzekutiv i Fonacionit për Liri Ekonomike. I shkolluar për Ekonomi dhe Financë në Bristol University në Angli, Kadia është rikthyer për të dhënë kontributin e tij në politikat ekonomike në Partinë Demokratike.
Në një intervistë për “Panorama”, Kadia shpjegon se cilat janë shtyllat ekonomike të programit ekonomik të PD-së dhe si do të arrijë opozita të kthejë besimin e humbur të shqiptarëve te politika. Pjesë e grupit të punës për hartimin e programit ekonomik, Kadia shpjegon se bashkëpunimi me CDU-në ka dhënë qartësi për të ndërtuar një ekonomi tregu funksionale.
Sipas sekretarit për “Sipërmarrjen e Lirë” në PD, roli i shtetit në ekonomi të dobëta si kjo e jona duhet të kufizohet në mënyrë që të garantohet një mjedis i paanshëm dhe konkurrues për bizneset vendase e të huaja. Kadia shpjegon se taksa e sheshtë është taksa e duhur që i duhet vendit dhe do të mundësojë formalizimin e ekonomisë. Sipas tij, taksa e sheshtë tërheq investimet e huaja dhe do të nxisë zhvillimin e bizneseve.
Për sekretarin e PD-së, thelbi i taksës së sheshtë dhe buxhetit të shtetit është që të gjejë një balancë mes nevojave të shoqërisë për shërbime sociale e publike dhe mjedisit konkurrues për sipërmarrje të lirë.
Panorama/d.i.
