Bajram Begaj dekretoi datën 12 shtator për nisjen e legjislaturës së re parlamentare të dalë nga zgjedhjet e 11 majit. Nëpërmjet një njoftimi për mediat, zyra e shtypit e presidentit publikoi foton e dekretit dhe të Presidentit duke hedhur firmën në letër.
Dekretin e tij kreu i shtetit e shoqëroi edhe me një mesazh për deputetët e rinj të Kuvendit, duke kërkuar nga ta bashkëpunim në interes të aspiratës së shqiptarëve për t’u bërë pjesë e BE-së.
“Kuvendi është simbol i demokracisë, është hapësira ku ju, të nderuar deputetë, do t’i përkushtoheni përgjegjësisë dhe angazhimeve të marra, është hapësira ku duhet të dëgjohen dhe të respektohen zërat e të gjithë shqiptarëve. Shqipëria ndodhet përpara një momenti historik në rrugëtimin drejt anëtarësimit në Bashkimin Evropian. Në përmbushjen e këtij prioriteti madhor, Kuvendi ka nderin dhe detyrimin të jetë përfaqësuesi i vizionit dhe aspiratës së shqiptarëve për një Shqipëri evropiane”, shkroi presidenti.
Por fjalët e presidentit nuk prodhuan reagim konstruktiv në sytë e opozitës. Gazment Bardhi nga PD ishte i pari që e cilësoi datën e përzgjedhur si të caktuar në zyrat e Partisë Socialiste, e jo të kreut të shtetit.
“Shqipëria nuk ka President të Republikës, por një ministër të Ramës në Presidencë, që firmos çdo gjë që urdhëron Taulant Balla. Çfarë turpi, çfarë niveli mediokër”, u shpreh Bardhi.
Sipas Kushtetutës, Presidenti Begaj kishte mundësi të përzgjidhte një ditë nga data 10 shtator deri më 20 shtator, por dita e 12 e muajit kishte ditë që ishte artikuluar jozyrtarisht nga socialistët. A2 CNN e pyeti zyrën e Presidentit se mbi cilat kritere kreu i shtetit përzgjidhi këtë datë për nisjen e legjislaturës, e jo një datë më të hershme. Përgjigja ishte se 12 shtatori ishte dita më e afërt që Kuvendi mund të mblidhej.
“Deri ditën e enjte, Presidenti nuk mund të nxirrte datën pa u certifikuar rezultati, dhe dita e vetme më e shpejtë për thirrjen ishte 12 shtatori”, sqaron presidenca
Pavarësisht qëndrimeve, e premtja e 12 shtatorit do të shënojë edhe nisjen e legjislaturës së re parlamentare, ku përplasja për datën se kur duhet të nisë parlamenti tingëllon si një paralajmërim për atë çfarë do të ndodhë në këtë legjislaturë të re parlamentare.
