Kryetari i Partisë Agrare Ambientaliste, Agron Duka thotë se Partia Demokratike po shkon drejt përçarjes dhe ndarjes në dy pjesë.
“Basha mori një vendim personal me idenë që të mos përçante partinë, por e kishte llogaritur keq dhe vendimi i Bashës solli përçarje.
Sot, Berisha njeriu që mbronte çdo veprim me Bashën tani ka dalë kundër këtij. Uroj që të kemi nesër një opozitë të unifikuar, por për mua është shumë e vështirë, që të kemi një PD të unifikuar. Mund të kemi dy parti nesër”, thotë Duka.
Ai thotë se kjo situatë zgjidhet vetëm në testin e zgjedhjeve, por paralajmëron se nëse në zgjedhje hyhet me dy PD, opozita do të humbasë edhe Shkodrën në rastet e zgjedhjeve të pjesshme.
Ndërkohë, deputeti Luçiano Boçi thotë se vendosi që të mbështesë Sali Berishën pasi u konsultua më parë me bazën e partisë në Elbasan.
“Partia duhet t’i shërbejë anëtarësisë. Nuk janë çmendur 44 mijë anëtarët e partisë që votuan në referendum. Unë dola në bazë dhe pashë atje se me kë ishte baza, me kë ishte anëtarësia. Shumica mbajti këtë anë”, tha ai./m.j
