Demokratët janë futur në fazën më të rëndësishme të organizimit të zgjedhjeve të 11 Majit, atë të përzgjedhjes së kandidatëve për deputetë përmes procesit të primareve.
Selia blu ende nuk ka përcaktuar një datë se kur do të ftohet anëtarësia për të votuar kandidatët e preferuar, por drejtuesit e saj janë në fazën finale të hartimit të udhëzuesit të mbajtjes së procesit, që deri tani mendohet të jetë në nivel qarku.
Ajo çka dihet deri tani është fakti se 20 drejtues degësh, bazuar në statutin e Partisë Demokratike, kanë dhënë dorëheqjen për t’u bërë pjesë e garës.
Për drejtuesit politikë pritet të vendosë Këshilli Kombëtar nëse do të hyjnë ose jo në primare.
PD-ja gjithashtu po negocion edhe me aleatët për hartimin e listës së përbashkët të koalicionit opozitar. Për këtë qëllim në selinë blu u zhvillua një takim mes Sekretarit të Përgjithshëm të PD-së, Flamur Noka dhe atij të Partisë së Lirisë, Tedi Blushi, i cili nuk dha detaje për mediet.
Meta, në Konventën e Tiranës pak ditë më parë përmes një mesazhi telefonik nga burgu, tha se do të jetë deputeti më i votuar i Tiranës, duke nënkuptuar se emri i tij do të jetë në listën e hapur të kandidatëve për deputetë.
RTSH
