PD, nuk është më parti proamerikane

Nga ARTUR  AJAZI

Ndryshe nga çfarë u tha, dhe çfarë u bë qysh në fillimet e veta si forcë politike, sot pas afro 30 vitesh në Partinë Demokratike, nuk ka mbetur më asnjë bërthamë e cila të jetë proamerikane.Në atë parti, gjithmonë e më shumë është duke u konturuar  dhe ushqyer një frymë antiamerikane, dhe kjo për shkak të qendrimeve të forta të Departamentit të Shtetit, kundër qëndrimeve radikale të opozitës së vjetër, siç ishte  djegia e mandateve, pengesat ndaj reformës në drejtësi, apo mospjesmarrja në zgjedhjet e e 30 qershorit, etj.Natyrisht përplasja e fortë e PD-së me SHBA-në, (apo mes saj dhe ambasasdorëve në Tiranë) ka nisur për reformën në drejtësi,dhe kjo është arsyeja thelbësore e përplasjes.Realisht  marrëdhëniet  mes tyre, kanë ardhur e janë ftohur dhe PD-ja, ka arritur deri aty, sa të lobojë në Uashington edhe kundër ndonjë ambasadoreje të emëruar nga Departamenti Shtetit.Ka kohë që qëndrimet e Uashingtonit ndaj PD-së nuk kanë ndryshuar.Për këtë arsye, PD-ja dhe Lulzim Basha (i yshtur nga Doktori tij)  ka kohë që i fryn idesë së “një aleati të ri strategjik për Shqipërinë, që nuk është SHBA, por Gjermania”. Sa qesharake dhe idioteske. Dhe fillimisht këtë “ide” e ka hedhur përmes ish-deputetit “demokrat” Kaç Islami, për të matur pulsin e opinionit dhe për të parë reagimet e përtej Atlantikut. Qëndrimi i Kaçit, nuk ishte thjesht i tij, pasi prej kohësh, zëra nga zyrat jashtë SHQUP-it dhe  Lulzimit,  kanë sulmuar SHBA-në me komente në faqen zyrtare të ambasadës merikane në Tiranë, sa herë që kjo e fundit mban ndonjë qëndrim për situatën politike në Shqipëri, apo bën ndonjë postim për ecurinë pozitive të reformës në drejtësi. Paksa e habitshme, se përse PD-ja e Lulzim Bashës  kërkon që Shqipëria të shpallë si “aleat strategjik Gjermaninë, dhe jo SHBA”, ndoshta është ndonjë qëndrim personal i kryetarit de jure, apo ndonjë skenar  tjetër ? Shpesh Lulzimi, ka mundur të lobojë fuqishëm kundër Shqipërisë, tek disa zyrtarë të CDU-së, ndoshta duke shpresuar se do të rrisë akoma edhe më shumë ndikimin gjerman,për t’iu kundërvënë qeverisë dhe Edi Ramës. Duket se shpresa e humbur e Lulzimit, për të dalë nga situata, ku e ka futur PD-në, ishte pikërisht CDU-ja dhe Gjermania, por e humbi bastin ashtu si gjithmonë.Nga ana e tij, Departamenti i Shtetit,ka qenë i vendosur që “PD-ja të respektojë sistemin, të bëjë politikë brënda sistemit, të mbështesë reformën në drejtësi,ti kthehet bashkëpunimit institucional”. Shqipëria është kombi më pro-amerikan në botë, dhe këtë gjë Lulzim Basha e di mirë, edhe pse ka patur shumë zëra kundër  idesë tij “gjermane” brënda asaj partie.Partner strategjik i Shqipërisë,është dhe do të jetë vetëm SHBA-ja, pavarsisht se Partia Demokratike, mundohet ta sfumojë këtë realitet.SHBA, mbetet  fuqia më e madhe botërore, që ka mbeshtetur  gjithmonë faktorin shqiptar në Ballkan, duke na trajtuar gjithmonë si “komb partner në marrëdhëniet dypalëshe”. Partia Demokratike e Lulzimit, nuk është më parti proamerikane, por thjesht një forcë politike në shterrim, që po “lundron” në drejtim të paditur deri në momentin kur timonieri saj, të humbë përfundimisht kontrollin mbi realitetin e brëndshëm dhe të jashtëm.