Sali Berisha është i dyzuar. Nga njëra anë kërkon zgjedhje të lira e të ndershme që të fitojë kundër Edi Ramës, ndërsa nga ana tjetër sigurohet që gara për kryetarin e partisë së tij të mos jetë e tillë.
Këto qëndrime u artikuluan pasditen e së martës në emisionin Studio Live në Report TV, ku të ftuar ishin avokati Romeo Kara dhe ish-kandidati për kryetar të PD-së Bujar Nallbani.
Nallbani u shpreh se Partia Demokratike nuk mund të ecë përpara me një njeri si Sali Berisha në krye, dhe u bëri thirrje demokratëve që të mos e ndjekin më. Sipas tij, Berisha po përdor partinë për të mbrojtur vetëm veten dhe rrethin e tij të ngushtë.
“Si mund të shkojë përpara PD me këtë njeri? I them demokratëve: “çfarë jeni ju që akoma mendoni të shkoni pas qerres së Saliut me 40 të tijët që i ka për të mbrojtur atë dhe familjen e tij. Berishës do t’i them: ‘Të lutem hiq dorë vullnetarisht se po të vjen fundi. Ty do të ta heqin kreun e partisë ose me gjyq, ose me anë të drejtësisë ose duke të të ekstraduar në SHBA si një njeri që instalon terrorizëm. Daljet e tij në bulevard me molotovë e me grupin e zjarrit janë të tilla. Si mund të lejohet grup zjarri në një shtet? A do vënë dorë demokratët? A do të distancohen nga kjo forcë politike që i shkatërron? Nuk mund të shkojë përpara opozita me këtë forcë politike”, tha Nallbani.
Edhe avokati Romeo Kara e akuzoi Berishën për drejtim autoritar të partisë dhe frikë ndaj vullnetit të lirë. Sipas tij, Berisha, përveç teserës së Partisë së Punës, mbart ende mentalitetin komunist. Për këtë arsye, ai i bëri thirrje të tërhiqet sa më parë nga drejtimi i partisë.
“Që nga dhjetori i ’90-ës, Saliu, edhe pse ka drejtuar me dorë të hekurt Partinë Demokratike, u bë Sali Sudja, Sali Xhaferri në ’97, u bë Sali Gërdeci, Sali Albpetroli por kurrë nuk u bë Sali Demokrati, Sali shqiptari, Sali njeriu. Si përfundim, ky njeri që proteston në ccdo kancelari ku mundet, dhe në bulevard për zgjedhje të lira e të ndershme, nuk lejon zgjedhje të lira e të ndershme në partinë e tij. Berisha ka frikë çdo shfaqje të vullnetit të lirë. Karshillëkun e ka tmerr. Ka frikë dhe Meremen e cila e tremb me vobektësinë e saj politike. Berisha delegjitimoi garën dhe qëndrimin e tij si kryetar. Ky nuk respekton kurrë Statutin por legjitimon interesin e tij. Ai njeri nuk ka turp. Ai është komunisti me teserën e Partisë Komuniste 10-86-90 të 8 nëntorit të vitit 1968. Hiq dorë tani! Flet ti për garë?’ tha Kara.
