90% e gjyqtarëve dhe prokurorëve që shërbejnë aktualisht në sistemin e drejtësisë janë emëruar në kohën e Partisë Demokratike.
Megjithatë, ashtu si në çështjen Tahiri, kjo forcë politike nuk bën asnjë përpjekje për të fshehur kapjen direkte që i ka bërë sistemit të drejtësisë.
Në fakt, një ndër deputetet e rinj të kësaj force, Romeo Gurakuqi, pavarësisht korrupsionit dhe inefikasitetit që mbizotëron në drejtësinë shqiptare, shkon deri atje sa t’i konsiderojë prokurorët si një “aset kombëtar”, karriera e të cilëve duhet mbrojtur me çdo kusht nga ana e shtetit tonë.
Në një editorial të publikuar pak kohë më parë, Gurakuqi në fakt, teksa kundërshton organet e reja speciale që po formohen si pjesë e procesit të vetingut, shkon deri atje sa të shkruajë:
“Fati/aspekti profesional, karriera pra dhe mbrojta në vijimësi e 20 prokurorëve më të rëndësishëm në vend, njëlloj si edhe e gjyqtarëve të këtij rangu, duhet të jetë i parashikuem dhe i garantuem”.
Komenti i deputetit thellohet më tej në argumentin e rremë se prokurorët e tanishëm janë një klasë e pavarur, ndonëse e vërteta është se shumë prej tyre janë emëruar në këtë detyrë vetëm falë lidhjeve direkte farefisnore, miqësore apo të favoreve, me familjen e ish-kryeministrit Berisha.
Nga tre prokurorët që po gjykojnë dosjen Tahiri, të tre të lindur në Tropojë, dy prej tyre janë kushërinj me Berishën, ndërsa i treti ka lidhje të ngushta politike me këtë familje. /TEMA/
