Deputetja e PD, Grida Duma u shpreh në emisionin “45 minuta” në Report Tv, se PD ka nisur përgatitjet për zgjedhjet vendore të 2019-ës. Sipas saj, kryetari i PD, Lulzim Basha e ka menduar se kë do kandidojë për kryetar të Bashkisë së Tiranës, i cili do të jetë përballë kandidatit të mundshëm nga e majta, kryebashkiakut aktual, Erjon Veliaj.
“Kandidatin për Bashkinë e Tiranës patjetër që lidershipi i PD e ka menduar. Apriori çdo kandidat tronditet. Çdo kandidat i cili nuk e merr garën si një garë për të fituar nga pozita e të humburit, atëherë është një naiv politik. Padyshim që është i tronditur. Se kur do jetë momenti këtë e vendos kryetari i PD. Janë menduar edhe kandidatët për bashkitë e tjera në rrethe”, u shpreh Duma.
‘LSI të japë prova që është në opozitë’
Sa i takon bashkëpunimit me LSI, Grida Duma thotë se kjo forcë politike duhet të provojë qartë që është në opozitë. “S’është definuar si koalicion qeverisës. LSI duhet të provojë qartë që është në opozitë sepse ka shumë pak që është larguar nga pushteti. Opozita është PD dhe që ka vuajtur dhe është duke provuar opozitarizmin e gjatë. Është partia e madhe ajo që mban përgjegjësitë, jo partitë e vogla”, tha ajo.
“Ndihma ekonomike, në Shqipëri 400 mijë të varfër”
Grida Duma, anëtare e komisionit për Çështjet Sociale akuzon qeverinë se ka larguar nga skema e ndihmës ekonomike familje të varfëra. Sipas saj në vendin tonë janë rreth 400 mijë qytetarë që jetojnë në varfëri, e thënë ndryshe 123 mijë familje të cilat deri në 2013 trajtohehin me ndihmë ekonomike.
“Deri në 2013 ishikn 123 mijë familje që përfitonin ndihmë ekonomike, sot, pas spastrimit të listës, kanë mbetur 80 mijë familje. Nëse vërtetohet se nuk ka të ardhura, atëherë kjo familje duhet të përfitojë ndihmën ekonomike. Paratë janë, problemi është si i shpërndajnë këto para. Nuk duhen mbajtur në skemë njerëz që janë në gjendje të punojnë dhe mund të punësohen në punë komunitare. Ne e kemi lënë me 123 mijë familje përfituese, 400 mijë njerëz në vend janë super të varfër. INSTAT thotë se një në 10 mijë fëmijë ha një herë në ditë, nuk duhet të habitemi për këtë.
Këta kanë hequr nga ndihma ekonomike familje, p.sh, sepse ka tualet në shtëpi, kuzhinë të ndarë, ka makinë larëse, Tv dhe frigorifer, këto janë kriteret e vendosur nga Ministria për të përfituar atë 55 mijë lekësh. Pra, kritere absurde. Qenka luks sot tualeti brenda në shtëpi, apo me lavatriçe. Pagesa për këto familje të varfëra është 1/10 e një koncesioni. 12 milionë euro në vit paguan qeveria për këto familje me ndihmë ekonomike. Vetëm në sektorin e shëndetësisë ne kemi koncesione 393 mln euro. Edhe 38 mln eurot e harxhuara për këtë reformën, me gjysmat e këtyre ne mbanim 4 vjet të gjithë ata që janë nxjerrë nga skema”, tha Duma e cila shtoi se kjo do të jetë kauza e opozitës.
Sa i takon situatës ekonomike, deputetja e PD tha gjithashtu se treguesit janë në rënie dhe klima e biznesit nuk po njeh përmirësim. “Niveli i varfërisë është rritur dhe nuk ka pikë dyshimi. Një vend matet nga rritja e investimeve të huaja, nga fuqia blerëse, rankimi i biznesit në renditjen botërore, janë në rënie. Rritja me 2-3% është e papërfillshme. Në 2008-2009 pati rënie të remitancave dhe efektet e kësaj ekonomia jonë i ndjeu në vitin 2012. Ata që thonin se në vitin 2008 nuk kishim krizë, ekonomistët e dinin se ne do të prekeshim nga kjo krizë”, tha Duma.
