Partia Demokratike i ka dërguar letër Komisionit Evropian dhe Parlamentit Europian për Paqen Fiskale.
Kështu ka bërë me dije deputetja e PD-së Jorida Tabaku. Tabaku tha se paqja fiskale është e dëmshme për ekonominë shqiptare.
“Amnistia fiskale, e maskuar si paqe fiskale është e rrezikshme, është e dëmshme për ekonominë shqiptare, por është e dëmshme edhe për marrëdhëniet me partnerët ndërkombëtarë, veçanërisht me BE-në. Gjatë javës së shkuar, kam informuar Komisionin Europian dhe Parlamentin Europian, për rreziqet që ka kjo amnisti fiskale.
Së pari, paqja fiskale është antikushtetuese dhe cenon barazinë para ligjit të bizneseve, që punojnë dhe operojnë ndershmërisht në këtë vend e të bizneseve, që mund ta përdorin amnistinë fiskale, për pastrimin e parave. Me këtë nismë, mund të pastrohen para në të ardhmen në Shqipëri dhe sidomos në ndërtim, që është kthyer në një gangrenë për ekonominë tonë. I kam kërkuar ministrit të Financave për paqen fiskale dhe për përfituesit e kësaj nisme dhe Ministria ka refuzuar. Ne kemi detyrim për të kontrolluar burimet ilegale që hyjnë në ekonomi dhe për të sjellë siguri për bizneset”, tha Tabaku.
Opozita prej kohësh ka kundërshtuar paqen fiskale, duke thënë se favorizon bizneset problematike.
