Partia Demokratike ka dalë kundër rritjes së masës së gjobave për të gjithë ata që ndotin dhe dëmtojnë pronën publike. Grupi i Këshilltarëve demokrat në Këshillin Bashkiak të Tiranës, janë shprehur kundër futjes në rendin e ditës së mbledhjes së sotme të pikës që parashikon rritjen e masave ndëshkimore për ndotësit dhe dëmtuesit e hapësirave publike.
Në ndërhyrjen e tij të parë në këtë mbledhje, Kryetari i Bashkisë është shprehur i keq ardhur që një forcë politike shprehet kundër masave që kërkojnë të rrisin pastërtinë në qytet.
“Duam të sjellim pastërtinë në Tiranë dhe as që e kisha menduar që në vitin 2015 të kishte forca politike që janë kundër pastrimit të qytetit”, – tha kryetari i Bashkisë, Erion Veliaj.
Gjithashtu ai u shpreh se rritja e masave ndëshkimore për ata që shkelin ligjin janë të nevojshme për sa kohë qyteti gjendet në një gjendje të keqe sa i përket pastërtisë. “Ne sot kemi një qytet më të pastër por shumë larg asaj që duhet të jetë. Ndaj falenderoj Këshillin që ne të fusim në rendin e ditës pikën që kërkon rritjen e masës së gjobave”, – u shpreh Veliaj. Pavarësisht kundërshtimit të këshilltarëve demokrat, Këshilli Bashkiak ka përfshirë me shumicë votash, ndryshimin e masave të gjobave në rendin e ditës së mbledhjes së sotme.
