Partia Demokratike ka dërguar sot në vendngjarje sekretaren Grida Duma. Bëhet fjalë për aksidentin me pasojë vdekjen e dy vogëlushëve në Golem të Kavajës, ku Duma e ka denoncuar si një skandal shtetëror.
“Është skandaloze sepse e njëjta firmë që ka karburantin mirëmban edhe rrugën. Prej dy vitesh nuk u zbatua vendimi i gjykatës. Kujtoj që pronar i karburantit është drejtori i Ministrisë së Transporteve” – tha Duma duke sjellë në vëmendjen hapësirën e krijuar në trafikndarëse që i mori jetën dy fëmijëve të familjes Negollari.
Pavarësisht se aksidenti ka ndodhur 6 ditë më parë, deri më sot Partia Demokratike nuk kishte reaguar zyrtarisht për ngjarjen e rëndë. Hetimet e mediave zbuluan se karburanti i favorizuar është në pronësi të ish-deputetit Pilo Keri mbështetës i LSI, djali i të cilit punon si drejtor në Ministrinë e Haxhinastos. (javaneës.al / r.a)
