Sipas Partisë Demokratike, Ministrja e Mbrojtjes Mimi Kodheli ka ndryshuar kriteret e dy tenderave në favor të një firme afër saj, duke shkaktuar një dëm prej 220 mijë dollarësh. Deputetja e opozitës Liljana Elmazi tha se për rikonstruksionin e godinës së ministrisë i janë marrë buxhetit të shtetit mijëra euro, në shkelje të procedurave dhe se firma fituese është një kompani pastrimi ku punonjësit e saj janë të regjistruar si fshesarë.
“Kontrolli ka zbuluar se Mimi e nisi rikonstruksionin e godinës pa marrë leje siç e detyron ligji, dhe për më tepër, kriteret ishin vendosur sipas firmës që ishte paracaktuar si fituese. Dhe firma fituese është një kompani pastrimi ku punonjësit e saj janë të regjistruar si fshesarë.
Kontrolli ka nxjerrë edhe abuzime të tjera si rritje të fondit për blerje, më shumë se sa ishte kërkesa e ushtrisë për mjete të blinduara, dhe del se ministria ka ndryshuar kriteret e tenderit duke i përshtatur me profilin e kompanisë ku janë blerë më pas makinat. Të gjitha ndryshimet, të kritereve dhe fondeve, janë bërë brenda ditës, me një nxitim të pajustifikuar.
Dëmi ekonomik në këtë rast është mbi 220 mijë euro, dhe procedura është shkelur me këmbë.” –tha Elmazi.
