Debati i nxehtë politik lidhur me kërkesën e Partisë Demokratike për shkarkimin e Presidentit të Republikës, Bajram Begaj, ishte tema kryesore e mbrëmjes së sotme në emisionin “Trialog” në RTSH 1.
Nën moderimin e Alba Alishanit, akuzat e opozitës dhe implikimet kushtetuese u diskutuan nga një panel i njohur analistësh dhe gazetarësh: Lorenc Vangjeli, Preç Zogaj dhe Arion Sulo.
Diskutimi në studio pritet të hedhë dritë edhe mbi bazën ligjore të kërkesës së PD-së dhe reagimin e institucioneve, si dhe mbi ndikimin e këtij zhvillimi në skenën politike vendase.
Analisti Lorenc Vangjeli ka reaguar ndaj nismës së Partisë Demokratike për të kërkuar shkarkimin e Presidentit të Republikës, Bajram Begaj, duke e cilësuar atë si një akt të pamenduar. Në komentin e tij, Vangjeli theksoi se situata politike dhe aktorët duken se po përsërisin të njëjtin skenar të viteve të shkuara.
“Kjo që ndodhi sot ishte marrëzi. Marrëzia është e njëjtë, aktorët janë njëlloj si vite më parë,” deklaroi Vangjeli.
Analisti shprehu zhgënjimin e tij për angazhimin e palëve politike në një diskutim që, sipas tij, nuk ka thelb, duke iu referuar shprehjes popullore për “të gjetur në lum gurin që hodhi Gazi”.
Vangjeli e lidhi nismën e re me përpjekjen e mëparshme për shkarkimin e ish-Presidentit Ilir Meta, duke përdorur si shembull rastin kur Gjykata Kushtetuese rrëzoi një dekret presidencial.
Referenca te Rasti Meta
Vangjeli argumentoi se fakti që një dekret presidencial rrëzohet nga Gjykata Kushtetuese (siç ka ndodhur edhe më parë) tregon se “institucionet funksionuan” dhe se dekreti ishte thjesht “i gabuar”. Ai kujtoi reagimin e fortë të PS-së pas njoftimit të Metës në qershor 2019 për shfuqizimin e dekretit të zgjedhjeve, i cili çoi në një mocion shkarkimi.
Në përfundim, Vangjeli pranoi se shkelja e Kushtetutës mund të jetë evidente, por vuri në dyshim rëndësinë e saj ligjore për të justifikuar shkarkimin e Presidentit.
“Shkelja e kushtetutës është evidente, por s’është aq e rëndë sa të justifikojë shkarkimin,” përfundoi analisti.
