Pasi nënkryetari i PD-së Luciano Boçi kërkoi zhvillimin e një mocioni me debat sot në Kuvend, kreu i grupit parlamentar Taulant Balla deklaroi nga foltorja se nuk ka një kërkesë të tillë.
Balla u shpreh se mazhoranca nuk është kundër zhvillimit të mocionit me debat për raportin e fundit të DASH, por për një gjë të tillë sipas tij duhet depozituar kërkesa nga opozita dhe më pas të shqyrtohet sipas procedurës.
“Ne nuk jemi kundër mbajtjes të çdo lloj debati në Kuvend. E para e vlerësoj faktin që ka një reflektim të thellë nga propozuesit dhe nga sa duket në kërkesë bëjnë pjesë te non-grata, por fakti që kanë hequr firmën e krye non-gratës, kuvendi duhet ta vlerësojë këtë gjë. Nuk jemi para një kërkese për një mocion me debat, neni 98 e përcakton qartë se si vjen një kërkesë e tillë, këtu ka kërkesë për të përfshirë në rend dite diçka që nuk ekziston.
Hajdeni lajeni gojën këtu, por nëse doni realisht mocion me debat ne jemi të gatshëm brenda 3 ditëve të thërrasim Konferencën e Kryetarëve, të përcaktojmë kohën sepse dhe ne duam të flasim për shumë gjetje të DASH. Duheshim mbledhur që në Maj të 2021 për të diskutuar për shpalljen non grata të një prej anëtarëve të Kuvendit, ne nuk hezitojmë. Këtu nuk bëhet fjalë do votojmë sepse s’kemi ça votojmë, s’ka kërkesë”, tha Balla.
Socialisti u shpreh se edhe për mocionin me debat për çështjen “McGonigal”, opozita nuk mbajti qëndrimin e duhur dhe u larguan nga salla e Kuvendit pa mbaruar koha e përcaktuar.
“Publiku na sheh, na gjykon, në fund të debatit që kërkuat pa limit, në fund ngelëm vetëm ne sepse ju kishit ikur të gjithë. Kur nuk na pëlqen, Blinkenin e çojmë në Paris dhe kur na pëlqen marim ndonjë fjali nga raporti”, shtoi ai.
Po ashtu, Balla tha se e rëndësishme është të zhvillohet një debat për çështjen e integrimit të Shqipërisë në Bashkimin Evropian.
“Shoh që nuk është në sallë zonja Tabaku, që të zhvillojmë një debat për çështjen e integrimit. Por, qoftë në traditën parlamentare dhe frymën e rregullores nuk prekin punën normale të Kuvendit. Profesor Boçi, hiri nuk ka numër shumës, sepse hiret është fjalë tjetër. Hiri është sasi dhe nuk ka numër shumës dhe nuk ju takon ju ta bëni këtë. Në fund, jam i sigurt që brenda kësaj salle ka kolegë e kolege të besimit islam, agjërim të lehtë, ta kuptojnë muajin e Ramazanit për reflektim dhe të gjithë ne të bëjmë më shumë punë të mira në dobi të popullit të përbashkët”, përfundoi Balla.
/a.r
