Në një sallë që oshtinte emrin e tij dhe me look-un e ri, Sali Berisha doli përpara dibranëve për të kërkuar mbështetjen për zgjedhjet parlamentare të 11 majit.
Të parët që kërkoi të bënte për vete ishin burrat dibranë, të cilët sipas kryedemokratit, dy ditë më parë u gjendën në një valë sulmesh nga Edi Rama. “Burrat e Dibrës janë si malet e Dibrës, mjerë ai që i sulmon”, tha Berisha.
Krahas mbrojtjes, Berisha duket se kërkoi t’i joshë më një premtim konkret.
“Nafta, të cilën Kosova e merr nga Durrësi dhe e shet 40 përqind më lirë, do zbresë në çmimin që e shet Kosova dhe Maqedonia”, shtoi kreu i PD.
Paratë për të ulur taksat dhe rritur pagat, kryedemokrati tha se do i gjejë duke ndalur korrupsionin, duke thënë se pika e tij më e fortë, është mosha, për të cilën kritikohet më shumë nga kundërshtarët.
“Në këtë moshë, në këto vite, në vjeshtën time të mrekullueshme, nuk më duhet pushteti. Nuk kam ambicie përpara, as për luks, por kam një ambicie, por kam një qëllim, por kam një mision, të bëj gjithçka për të ndryshuar jetën tuaj.”
Objektivi i demokratëve për qarkun e Dirës është katër mandate parlamentare nga tre që fituan katër vite më parë.
