Partia Demokratike i është rikthyer betejës së dekriminalizimit. Partia më e madhe e opozitës ka bërë një denoncim konkret në Prokurori me emrat e dy deputetëve. Kjo forcë akuzon për të shkuar kriminale në Itali deputetin e PDIU Aqif Rakipi, ndaj të cilit edhe më herët janë bërë verifikime nga organi i akuzës por ka rezultuar i pastër.
Sipas PD, Rakipi ka të shkuar kriminale në shtetin italian. Letra e PD i adresohet edhe Komisionit Qëndror të Zgjedhjeve. Po ashtu, PD ka depozituar kërkesë edhe për deputetin e PS Gjetan Gjetani, që sipas selisë blu edhe ky rezulton me të shkuar kriminale në Itali.
Kjo forcë kërkon zbatimin e ligjit të “Dekriminalizimit” për deputetët në fjalë./a.m.
Deklarata e plote e PD
Grupi Parlamentar i Partisë Demokratike depozitoi sot në prokurori kërkesën për kontrollin e të dhënave të dekriminalizimit për deputetin Aqif Rakipi dhe për deputetin Gjetan Gjetani, lidhur me dyshime për fshehjen e të dhënave për aktivitet kriminal, që sipas ligjit për dekriminalizimin duhej ti pengonte për të marrë poste publike apo për tu zgjedhur.
Denoncime nga publiku dhe partnerët pranë Partisë Demokratike përbëjnë indicie për të verifikuar nëse të dy këta deputetë kanë fshehur rekorde kriminale në të kaluarën e tyre në lidhje me aktivitete të paligjshme të kryera në Itali.
Partia Demokratike është e vendosur në betejën e saj për të luftuar krimin, dhe për të nxjerrë krimin nga parlamenti dhe institucionet e shtetit.
Në të kundërt, lidhur me këto dy raste por edhe të tjera që po trajtohen nga Partia Demokratike, Edi Rama dëshmon se vazhdon të mbrojë dhe promovojë krimin, se nuk ka vullnet ta zbatojë ligjin e dekriminalizimit, dhe nuk ka vullnet të shkëputet nga krimi dhe aleanca politike me krimin.
Partia Demokratike i kërkon Prokurorisë të veprojë menjëherë e të garantojë zbatimin e dekriminalizimit.
Aqif Rakipi dhe Gjetan Gjetani
