Buxheti i vitit 2018 për infrastrukturën është 42% më i lartë se buxheti i vitit paraardhës.
Kështu deklaroi sot nga Peshkopia, Kryeministri Edi Rama, ndërsa theksoi se “janë 9 akse madhore që do të përfundojnë në këto tre vite që kemi përpara”.
Kreu i Qeverisë solli në vëmendje deklaratat e ish-kryeministrit Sali Berisha në vitin 2009, sipas së cilit: “Ky katërvjeçar do të jetë katërvjeçari i përfundimit të rrjetit modern rrugor, që do të përgjysmojë distancën me Tiranën nga të gjitha skajet e vendit, Vermoshi e Konispoli, Saranda, Gjirokastra e Tropoja, Dibra e Korça”.
Sipas Ramës, “me rrugët e reja që do të ndërtohen, ironi e fatit apo drejtësi e historisë, vihet në vend edhe premtimi i 2009 i Saliut, kurrë i realizuar, si gjithë të tjerët”.
Në kundërvënie me realitetin, i cili dëshmon se asnjë nga këto akse nuk është përfunduar, Kryeministri Rama solli edhe një tjetër deklaratë të ish-kryeministrit Berisha, i cili theksonte se: “brenda dy viteve që vijnë, do të përfundojnë këto autostrada: Rruga e Arbrit, Tiranë-Elbasan, Qafë-Plloçë-Qukës, Boshti i Jugut në trajektoren Elbasan-Belsh-Kuçovë-Berat-Kardhiq-Delvinë-Konispol-Sarandë, autostrada Fushë-Krujë-Ura e Limuthit, si dhe shndërrimi në katër korsi i autostradës Shkodër-Vlorë”.
“Zero! As për dy dhe as për katër vjet! Shiritat i preu të gjitha dhe daullet ranë për këto, por asnjëri prej tyre nuk u bë realitet, sepse ishte e gjitha një piramidë elektorale rrugësh pa lekë në arkën e shtetit”, – tha Rama.
Duke iu rikthyer historisë së “Rrugës së Arbrit”, Kryeministri Rama theksoi se “300 e kusur milionë euro, Saliut nuk ju dukën kush e di çfarë për të nisur një aventure shqiptaro-kineze me ‘Rrugën e Arbrit’”.
“Domosdo, sepse pa i buxhetuar nuk merrte asnjë përgjegjësi, po ua linte peshqesh në formë vrimash në xhepat e shqiptarëve dhe të ardhmes së fëmijëve të tyre. Na u desh ta anulonim atë marrëveshje të shtrenjtë, jo vetëm për shkak te kostos, por edhe të produktit”, – tha Rama.
