Banorët e fshatit Imsht në Lushnjë kanë protestuar sot për mungesën e rrugës dhe investimeve, çka ua ka bërë jetën shumë të vështirë.
Partia Demokratike në një deklarate për mediat bën të ditur se i pranishëm në protestë, ishte kryetari i Partisë Demokratike për Lushnjen, Myslym Murrizi, i cili denoncoi qendrimin me dy standarte të qeverisë, ku sipas tij po investohet për ata që janë të lidhur me qeverinë dhe braktisjen e mijëra familjeve të zonës.
“Jemi sot me banorët e fshatit Imsht, një ndër fshatrat më të mëdhenj që ka sot Bashkia e Lushnjës. Në zemër të Myzeqesë e Shqipërisë, rreth 500 familje kanë nje rrugë në një gjendje të mjerueshme, Ndërkohë para 4 ditësh kryeministri Rama inaguroi një investim të një klienti të qeverisë, të një oligarku të oborrit duke ja çuar asfaltin deri në derë të serave”, tha Murrizi.
Po ashtu, kryetari i PD-së Murrizi tha se “këtu banoret kanë 500 hektarë tokë dhe vuajnë të nxjerrin prodhimet e tyre. Kanë vite që mashtrohen nga politika për rrugën dhe 8 muaj pas zgjedhjeve lokale, kryebashkiaku as që ka denjuar të vijë të takojë këta banorë dhe ti pyesë për rrugën.
“Partia Demokratike është në mbëshetje të tyre dhe nesër në pushtet, hallet që kanë do të jenë prioritet për zgjidhje”, tha Murrizi.