Brenda dhe jashtë mbledhjes së grupit parlamnetar të PD të mbajtur sot, ka pasur disa mesazhe direkte, si kurrë më parë, për dy ambasadorët Lu dhe Vlahutin, që po ndërmjetësojnë për reformën në drejtësi. Kreu i PD Lulzim Basha është shprehur hapur para deputetëve se “Vlahutin është rreshtuar politikisht” në proces.
Një deklaratë tashmë publike, e cila pason luftën e gjatë të heshtur që opozita ka bërë në distancë me ambasadoren e Bashkimit Europian, e cila është konsideruar prej kohësh si një person armiqësor brenda rradhëve të demokratëve.
Por nuk ka mbaruar me kaq. Sapo ka mbaruar mbledhja, ish-kryeministri Berisha ka bërë një tjetër insinuatë, e cila megjithëse mbetet e paqartë, ka mundësi t’i jetë drejtuar ambasadorit amerikan Donald Lu. Berisha ka folur për një përfaqësues të një qeverie, i cili ndryshe raporton para vendit të tij, e ndryshe vepron në Tiranë.
Me një logjikë të thjeshtë, mund të supozohet se Vlahutin, si ambasadore e një organizmi prej 28 vendesh, nuk mund të konsiderohet si përfaqësues e një qeverie të vetme. Në rast se sulmi i Berishës do t’i drejtohej ambasadorit amerikan, do të kishim një rast ekstrem të armiqësisë së palës opozitare, me faktorin ndërkombëtar, i cili është parë historikisht si një rregullator i pazavendësueshëm në klimën e brendshme politike shqiptare. Megjithëse jo përherë ka qenë kështu, sidomos kur kujton konfliktet që ish-kryeministri Berisha ka pasur me amerikanët në të shkuarën./Javanews.al/
