Kjo e enjte pritet të sjellë debate të forta mes opozitës dhe maxhorancës, teksa PD është e vendosur që të bllokojë punimet e kuvendit nëse nuk ndryshon rendi i ditës në parlament.
Propozimet e reja të opozitës në lidhje me ligjin për Dekriminalizimin si dhe zbardhja e vendimit të Gjykatës Kushtetuese për mandatin e deputetit Koço Kokëdhima do të jenë dhe dy pikat kryesore të presionit që do të bëjë opozita këtë të enjte.
Propozimet e reja për ligjin e dekriminalizimit, të pakonsultuara me maxhorancën, vënë në shënjestër deputetin Armando Prenga si dhe synojnë pezullimin e ushtrimit të mandatit të tij dhe të atyre personave që janë akuzuar dhe arrestuar për krime kundër jetës. Pavarësisht dorëheqjes së Prengës nga jeta parlamentare, vetë kreu i PD-së Lulzim Basha e ka cilësuar këtë si një truk i bërë nga dora e Ramës dhe se nëse maxhoranca nuk mer në shqyrtim amendimet e reja për dekriminalizimin, do të ketë pasoja.
Nga ana tjetër, Gjykata Kushtetuese ka zbardhur vendimin në lidhje me mandatin e deputetit socialist Koço Kokëdhima, duke thënë se vendimi i Kuvendit për të mos sjellë për shqyrtim mandatin e tij, është në kundërshtim me Kushtetutën.
Kjo do të thotë se Kuvendi do të jetë i detyruar që të çojë në Gjykatë për shqyrtim Mandatin e Koço Kokëdhimës, për të mos harruar edhe mandatin e deputetes dhe njëkohësisht nënkryetares së parlamentit, Valentina Leskaj.
Beteja e parë do të jetë në Konferencën e Kryetarëve, ku PD do të kërkojë ndryshimin e rendit të ditës dhe futjen me urgjencë në të të këtyre dy pikave. Në të kundërt, opozita ka vendosur që të tendosë seancën, duke bllokuar podiumin e parlamentit. Veprimet mund të shkojnë deri aty sa opozita të braktisë edhe seancën e sotme parlamentare.
