Partia Demokratike ka denoncuar një tjetër rast, që sipas saj tregon qartazi korrupsionin e qeverisë. Deputetja demokrate Arjola Halimi tha se Rama i ka dhënë dy kontrata të tjera djalit të Valentina Leskajt, me një vlerë prej 1 milionë e 620 mijë eurove.
“Qeveria ia jep këto para djalit të nënkryetares së kuvendit për mbikqyrje të punës për rehabilitimin e digave dhe për të përgaditur planin e menaxhimit të baseneve lumore për Drin-Buna dhe Seman.
Ja ku janë dokumentat, kontratat.
1 milionë e 620 mijë euro për letra pra, që firma e djalit të zonjës Leskaj të prodhojë disa letra.”- tha deputetja Halimi.
Deputetja e opozitës ka ironizuar me rastin në fjalë duke thënë se është mjaft e çuditshme kur sheh se po i njëjti person dhe e njëjta firmë, që fituan kontratën për trajnimin e personelit të OSHEE, është po ashtu edhe i aftë të ofrojë ekspertizë për digat e lumenjve të vendit.
“Habi e madhe është se si djali i zonjës Leskaj qenka i vetmi në Shqipëri që ofron ekspertizë edhe për stresin e punonjësve të KESH-it në këmbim të 700 milionë lekëve për 4 muaj, po dhe ekspertizë për digat e lumenjve. Ky është një korrupsion skandaloz dhe i paimagjinueshëm.
Ky është në fakt, shteti korruptiv që ka ngritur Edi Rama, shtet korruptiv që çdo ditë ndan paratë e shqiptarëve me rrethin e ngushtë të biznesmenëve të kryeministrit.” Thekson Halimi.
PD rikujton edhe një herë kërkesën e saj në liodhje me mbledhjen e Këshillit të Mandateve, për të diskutuar mbi mbarimin e mandatit të nënkryetares së parlamentit, deputetes socialiste Valentina Leskaj.
“Partia Demokratike ka bërë një kërkesë pranë Kuvendit për mbarimin e mandatit të deputetes Leskaj, pasi djali i saj i madh mori hekurudhën Ballsh-Fier-Vlorë për 25 vjet. Ligji i ndalon fëmijët madhorë të një parlamentari të marrin fonde apo të nënshkruajnë kontrata me zyrat publike.
Sot, ne do ti shtojmë kërkesës tonë, edhe këto kontrata që ka marrë ABKONS, firma e djalit tjetër të zonjës Leskaj. Paratë dhe privilegjet duhet të kthehen, ligji duhet të funksionojë. Partia Demokratike do ta çojë deri në fund këtë çështje, me çdo mjet.”- përfundon fjalën deputetja opozitës.
