Siç edhe është bërë publike që mbrëmë, lista që PD ka dorëzuar per zgjedhjet e 25 qershorit është gjysmake dhe e paplotësuar me të gjitha dokumentet e kërkuara sipas ligjit.
Sipas burimeve nga KQZ, mësohet se PD ka depozituar vetëm 95 emra kandidatësh ndërkohë që edhe për këto emra nuk ka depozituar asnjë formular dekriminalizimi, si dhe nuk ka paraqitur jo vetëm kopjet e kartave të identitetit, por madje as ka plotësuar ditëlindjet e kandidatëve.
Një fakt të tillë e vërtetojnë edhe listat e PD-së për Qarqet Vlorë dhe Tiranë, të cilat kanë rënë në duart e mediave, ku siç mund të konstatohet nga fotot, respektivisht në Vlorë janë paraqitur vetëm 7 kandidatë nga 12 mandate që ka kjo zonë, dhe në Tiranë vetëm 18 nga 34 mandate që ka Qarku.
Referuar afateve të përcaktuara në Kodit Zgjedhor sot fleta e votimit duhej të ishte konfiguruar dhe të ishte derguar për të filluar shtypja e saj, por duket se parregullistë në listat e kandidatëve të PD janë bërë shkak që KQZ të shtyjë mbledhjen përtej afatit ligjor duke vënë seriozisht në pikëpyetje ecurinë e procesit. Kujtojmë se dhe depozitimi në KQZ i listave të kandidatëve u bë sot në mëngjes nga PD-ja përtej afatit ligjor.
KQZ ishte parashikuar që të mblidhej sot për të miratuar listat, por mbledhja u shty për nesër, pasi listat janë gjysmake. Nuk dihet nëse kjo është bërë për t’i dhënë kohë PD-së, por ajo që mund të konstatohet lehtësisht është se kemi të bëjmë me shkelje të afateve ligjore dhe të Kushtetutës./a.ç
