Partia Demokratike ka lëshuar akuza të ashpra ndaj kryeministrit Rama ditën e sotme.
Në një deklaratë për mediat, PD denoncon Ramën I cili sipas saj ka urdhëruar kontrollin e gazetarëve të Agon Channel në kufi.
Selia blu shprehet se kjo është shkelje e lirisë së medias.
“Partia Demokratike dënon përndjekjen që Edi Rama po i bën punonjësve, gazetarëve dhe përfaqësuesve të medias. Dërgimi i të dhënave personale në pikat kufitare me urdhrin ndaj policisë për kontroll të imtesishëm per gazetarët, analistët, por dhe qindra punonjësve të Agon Channel, ështe nje rekord skandaloz i Edi Ramës, një goditje brutale e lirisë së shprehjes. Një persekutim i tillë për një media kritike me qeverinë, duke urdhëruar kontroll të imtesishëm për gazetarët ne kufi, çka është presion dhe turpërim publik i tyre, nuk ka ndodhur në vendin tonë që prej vendosjes së pluralizmit dhe fitimit të drejtës së shprehjes. Partia Demokratike e konsideron këtë një sulm të drejtpërdrejtë të Edi Ramës ndaj medias së lirë, dhunim barbar i standardit demkratik, hakmarrje primitive ndaj gazetareve që nuk mendojnë si ai e që nuk i ka nën kontroll. Ne inkurajojmë gazetarët që përndiqen nga Edi Rama të vazhdojnë misionin e tyre në shërbim të lirisë dhe interesit publik. Kauza e tyre sot është kauza e shumicës absolute të qytetarëve te vendit,” thuhet në deklaratë.
