Sikurse ishte paralajmëruar, është mbledhur sot në ambientet e Kuvendit komisioni hetimor për CEZ. Nën drejtimin e Taulant Ballës, komisioni ka miratuar rregulloren ndërsa kreu i komisionit tha se OSSH nuk ka qenë e gatshme për privatizimin e CEZ.
“Në komision pritet të ketë disa seanca dëgjimore. Sot është mbledhja e dytë dhe opozita sërish mungon, pavarësisht se çështja e CEZ është një çështje që ata vetë e kanë kërkuar” – tha Balla.
Ndërkohë, kreu i komisionit lexoi konkluzionet paraprake ndërsa tha se nuk është bërë asnjë analizë teknike mbi ofertuesin çek.
Por deputeti Pjerin Ndreu kërkoi që të mos paragjykohej puna e komisionit dhe shprehu dyshimet për paraqitjen e Sali Berishës si dëshmitar në këtë Komision.
Dyshimeve të kolegut të tij, kryetari i komisionit Taulant Balla iu përgjigj duke përmendur rregulloren, që parashikon edhe marrjen forcërisht të dëshmitarëve për të dëshmuar.
“Komisioni punon sipas Kushtetutës dhe thirrja e dëshmitarëve bëhet me një vendim të ndërmjetëm. Pra, nëse ne do të vendosim me vendim të ndërmjetëm që të thërrasim dëshmitarët forcërisht atëherë do të zbatohet ligji dhe vendimi”, tha Balla
