Ibsen Elezi foli për protestën e paralajmëruar nga Partia Demokratike dhe bllokimin e disa akseve në Tiranë.
Gjatë intervistës në një intervistë në “Tirana Live” në ABC News u shpreh se nuk është pro kësaj formë, duke theksuar se nuk ka të bëjë aspak me një mosbindje civile, por vetëm një protestë për të bllokuar rrugët dhe me synimin për të marrë vëmendjen e opinionit publik.
“Kjo nuk është mosbindje civile, por një protestë e konceptuar për të bllokuar rrugë. Gjatë gjithë ditës po të shohësh has bllokime rrugësh, kudo. Unë kam qenë kundër edhe në 2018, ku u mor një vendim nga PD për të bllokuar rrugë. Ky është një veprim që nuk përbën sens. Nëse do të tregosh që ke mosbindje civile, ke njerëzit shko në Kryeministri dhe bllokoje.
Zoti Berisha do të ndërtojë aksione për të mbajtur aktiv, pjesën e vet. PD nuk ka më çfarë jep. Kur shkojnë në parlament kemi parë që marrin vendime që i shkojnë më në përfitim Edi Ramës. E theksoj që në parim nuk jam dakord për bllokim të rrugëve. Një parti politike e madhe të shkojë të bllokojë rrugë, krijon edhe pakënaqësi ndaj qytetarëve. Këto edhe aksionet politike i ndërtojnë në një formë të tillë që të humbin edhe votëbesimin e vet.
Po të kenë aq shumë njerëz për të demonstruar forcën në shesh, japin imazh tjetër, japin imazhin e një forcë politike që ka forcë për të ushtruar presion. Betejat politike nuk janë këto të rrugës, beteja reale janë zgjedhjet, përballjet në rrugë janë dhënie mesazhesh. Vullnetarët e Berishës, Albana Vokshi, Noka, thonin që duhet ta bëjmë garën e partisë për 10 ditë.
E bënë për 10 ditë, manipuluan votat dhe dolën për faqe të zezë. Rrugëtimi i tyre nuk është më ai rrugëtim që ka një strategji…Këta kanë çorientuar edhe elektoratin e vet. E vetmja gjë që protestojnë sot është që duan t’u gjejnë punë atyre njerëzve, dhe të zënë gjithashtu hapësirën mediatike…
E rëndësishme për këta është që të jenë në qendër të opinionit publik. Një pjesë e demokratëve e besojnë se kështu rrëzohet Edi Rama, dhe shkojnë përplasen, pavarësisht se këta tjerët e dinë që nuk ndodh”, tha ndër të tjera ai.
