Selia blu ka akuzuar sot qeverinë se po përdor paratë e mbledhura nga arkëtimet e OSHEE për interesat e saj të ngushta. Në një deklaratë për mediat, zëdhënësja e PD tha se është hera ë parë që OSHEE ka vendosur të shpenzojë kaq shumë para për trajnime. Sipas demokratëve, institucioni në fjalë është denoncuar për afera korruptive vazhdimisht.
“Këto 720 milionë lekë që dorovit OSHE sipas qejfit e interesave, janë sa vlera e 8 mijë e 728 pensioneve në fshat, sa 4 mijë e 799 pensione në qytet, 10 mijë e 511 pagesa papunësie, dhe 19 mijë e 846 ndihma ekonomike. OSHE është denoncuar për afera korruptive vazhdimisht, dhe abuzimin e ka tiparin e saj kryesor. OSHE ka aplikuar që në fillim dy standarde, duke dërguar në burg e duke i nxitur drejt vetvrasjes famijarë të pamundur për debi deri në 30 mijë lekë të vjetra, ndërkohë që ka favorizuar klanet afër qeverisë e deputetë me detyrime qindra milionë lekë energji” – tha zëdhenësja e PD, Oriela Nebiaj.
Partia Demokratike i bëri thirrje prokurorisë të hetojë këtë rast skandaloz të abuzimit financiar. Sipas opozitës, ajo do të vërë para ligjit e para përgjegjësisë abuzuesit me fondet publike, sapo shqiptarët ti besojnë drejtimin e vendit.
Nebiaj u shpreh se OSHE është e specializuar në abuzime, pasi vetë drejtuesi i saj, i përzgjedhuri i Edi Ramës në krye të organizatës, është hetuar për abuzime në dhjetra tendera në Bashkinë e Durrësit.
“Tenderi i fundit, ose më saktë, porosia e fundit për ti dhënë njeriut të Edi Ramës 720 milionë lekë, është në vazhdën e skandaleve qeveritare me fondet publike, me taksat e qytetarëve” – përfundon deklarata e PD.
