Pak flitet për të dhe akoma më pak njihet thellësisht. Megjithatë ajo është dora e padukshme që ka ngritur Elon Musk dhe shokët e tij.
Anëtarët e këtij klubi janë disa nga personat me më shumë ndikim në botën teknologjiko-financiare e vitet e fundit edhe politike. PAYPAL MAFIA, është një akronim që bashkon disa nga emrat më të fuqishëm të BIG TECH.
Ajo funksionon përmes dorës së padukshme, pas perdeve e larg nga vëmendja e ethshme e vanitetit dhe vulgaritetit të rrjeteve sociale, sado që një pjesë e anëtarëve të klubit kanë rrjetet e tyre të fuqishmë sociale e kompani të shumta, që shërbejnë për gjithëfarëlloj shërbimesh nga komunikimi, te pagesat, konsulenca, etj.
Çfarë nënkupton PAYPAL MAFIA
PAYPAL MAFIA përfshin një grup ish-punonjësish dhe themeluesish të PayPal-it, të cilët më pas themeluan e zhvilluan kompani të tjera teknologjike.
Termi u bë i njohur kur një shkrim i vitit 2007 në revistën “Fortune” përdori frazën në faqen e parë, duke emërtuar anëtarë të tillë si Peter Thiel, Max Levchin, Elon Musk, Reid Hoffman, David Sacks dhe të tjerë.
Anëtarët e “PAYPAL MAFIA” mbetën të lidhur me marrëdhënie shoqërore dhe biznesi dhe një numër prej tyre punuan së bashku për të formuar kompani të reja dhe firma sipërmarrëse në vitet në vijim.
Sukseset individuale të këtij grupi njerëzish pas PayPal-it, si dhe lidhjet e tyre së bashku, ndihmuan që termi “PAYPAL MAFIA” të merrte famë. Grupi është i lidhur me themelimin dhe zhvillimin e kompanive si Tesla, SpaceX, LinkedIn, YouTube, Palantir, Yelp dhe Yammer, ndër të tjera.
Animi nga Trump
Pak vite më parë, PAYPAL Mafia me seli në Silicon Valley të Kalifornisë njihej si mbështetëse e palëkundur e Demokratëve amerikanë duke iniciuar e financuar kauza sociale si arsimi, shëndeti publik, ndryshimet klimatike, e drejta e abortit etj.
Por së fundmi klubi është zhvendosur djathtas duke mbështetur republikanët. Roger McNamee, investitor veteran kapitali përmendi disa arsye pse drejtuesit e teknologjisë i kanë braktisur ato që dikur i mbanin si vlera të shenjta.
“Ata besojnë se kriptomonedhat, taksat e ulëta dhe mungesat e rregulloreve janë thelbësore për prosperitetin e industrisë së teknologjisë dhe janë të bindur se Trump mund t’ua ofrojë të gjitha këto. Emërimi i Elon Musk në administratën e re Trump është një pikë shumë e fortë në këtë drejtim” – tha ai.
Ndërkohë, nga këndvështrimi i Big Tech, presidenti Biden dhe demokratët kanë qenë jashtëzakonisht të ashpër ndaj teknologjisë në krahasim me administratat e kaluara përmes rregulloreve të shumta, sado që kanë përdorur jo pak prej kompanive të BIG TECH për të goditur konservatorët dhe rebublikanët e krahut të Trump.
Anëtarët kryesorë të PAYPAL MAFIA
Peter Thiel – Bashkëthemelues dhe shef i Palantir Technologies, Founders Fund, firmë kapitali sipërmarrës. Ai ka bërë investime të hershme në Facebook, LinkedIn dhe Yelp si dhe bashkëthemelues i Mithril Capital Management.
Max Levchin – Bashkëthemelues dhe shërbyes si shef i Affirm, kompani e teknologjisë financiare. Bashkëthemelues dhe shef i Slide, një kompani e rrjeteve sociale e blerë nga Google e Glow, ndërsa ka bërë investime të hershme në Yelp, Pinterest dhe Stripe.
Elon Musk – Bashkëthemeloi dhe shef i SpaceX, Tesla, Neuralink dhe Boring Company.
Reid Hoffman – Bashkëthemelues dhe shef i LinkedIn, Greylock Partners. Ai ka bërë investime të hershme në Facebook, Airbnb dhe Zynga.
David Sacks – Bashkëthemelues dhe shef i Yammer, Zenefits, PayPal. Ka bërë investime të hershme në Facebook, Uber dhe Airbnb.
Keith Rabois – Nënkryetar ekzekutiv i Square, shef i Opendoor, bashkëthemelues i Founders Fund. Ka bërë investime të hershme në LinkedIn, Yelp dhe YouTube.
Roelof Botha – Ka shërbyer si shef i PayPal, partner në Sequoia Capital. Ka bërë investime të hershme në YouTube, Square dhe Instagram.
Kriminiltrading, Vanity Fair – Përgatiti për Hashtag.al, Klodian Manjani
