Presidenti i Komisionit Europian Jean Claude Juncker deklaroi hapur se nuk e dëshiron pavarësinë e Katalonjës për arsyen e thjeshtë se kjo nuk do të inkurajonte edhe rajone të tjera të bënin të njëjtën gjë, duke e komplikuar kështu qeverisjen e BE-së.
Në një fjalim të mbajtur në Universitetin e Luksemburgut, kreu i krahut ekzekutiv të bllokut tha si me shaka se Bashkimit Europian nuk i vjen për shtat të numërojë me dhjetëra anëtarë pas një dekade e gjysmë për shkak të shkëputjes së territoreve nga anëtaret ekzistuese.
“Nëse lejojmë, edhe pse nuk na takon ne zgjidhja e kësaj çështjeje, që Katalonja të fitojë mëvetësinë, të tjerë si ajo do të hedhin të njëjtin hap e kjo nuk na pëlqen. Nuk do të doja që pas 15 vjetësh të kishim një Bashkim Europian me 90 vende anëtare”, ka thënë Juncker.
Ish kryeministri i Luksemburgut shtoi se Komisioni nuk do t’i përgjigjet thirrjeve për ndërmjetësim nëse këtë ia kërkon vetëm njëra palë. Tendencat separatiste në Europë e shqetësojnë shefin e KE-së, i cili e inkurajoi kreun e ekzekutivit spanjoll Mariano Rajoy ta vërë gjendjen nën kontroll. BE-ja ka shprehur besimin se Rajoy do të arrijë të zgjidhë atë që blloku e sheh si çështje të brendshme të Spanjës.
Në 11 tetor, Madridi zyrtar i la presidentit të Katalonjës 5 ditë afat për të sqaruar saktësisht nëse do të shpallë apo jo pavarësinë e rajonit autonom, e në rast se ai e konfirmon një gjë të tillë, ka dhe tre ditë të tjera në dispozicion për ta përmbysur vendimin./a.m.
