Situata në Partinë Demokratike nuk është e qetë, pasi selia blu dhe deputetët e saj janë të ndarë ndërmjet dy kryetarëve, atij aktual Lulzim Basha dhe ish-liderit Sali Berisha. Për këtë arsye, një nga deputetët më kritikë të Bashës, Astrit Patozi ka qenë dje në zyrën e Berishës.
Siç raporton gazeta “Sot”, Patozi nuk është aspak i kënaqur me mënyrën e të bërit opozitë të Bashës. Sakaq, Berisha ka pasur takime me deputetët kritikë të Lulzim Bashës ku jo pak herë ka pritur Ridvan Boden, Jozefina Topallin, Genc Rulin etj. Madje, kohë më parë, një grup deputetësh, i njohur si garda e vjetër, i kërkoi Berishës të rikthehej në krye të PD.
Ndërkohë nga ana e tij Basha ka nisur spastrimet brenda Forumit Rinor të PD-së në përpjekje për t’u përgatitur për zgjedhjet parlamentare të vitit 2017.
Lulzim Basha, do të nxjerrë sot udhëzimin për përzgjedhjen e lidershipit të ri të kësaj partie. Me këtë hap, hapet përfundimisht rruga për pretendentët që duan të marrin kryesimin e Forumit Rinor të Partisë Demokratike, në kryesimin qendror dhe në degë.
Mesa duket, Lulzim Basha ka vendosur që të pastrojë këtë forum nga të gjithë ata elementë që janë kundër tij.
