“Fiks Fare” ka sjellë këtë të premte jetën tjetër të natës të kryeqytetit shqiptar. Në rrugët e Tiranës ka shumë njerëz të cilët e gdhijnë aty, duke përballë me vështirësi të ndryshme për të siguruar bukën e gojës.
Një punëtor i bashkisë që merret me pastrimin e rrugëve tregon vështirësitë me të cilat përballet çdo natë. Ai thotë se shpesh është i detyruar të durojë ofendimet e njerëzve të cilët kanë abuzuar me alkoolin dhe e rastisin atë në rrugë.
“Çdo natë rri deri në ora 04:00. Me këtë punë siguroj jetesën. Paguhem 8500 lekë (të vjetra) nata. Vështirësi ka sepse ka tipa që pinë raki e drogë dhe na ofendojnë. Kjo na ndodh shpesh”, tregon ai.
Ndërkohë, një tjetër është i detyruar të mbledhë kanaçe për të siguruar jetesën. Ai thotë se më mirë që të sigurojë të ardhurat në këtë mënyrë, sesa të vjedh.
“Dal çdo natë, kam tre fëmijë dhe me këtë i mbaj. Shikoni këto duar, me këto kap lloj-lloj pisllëqe. Nuk më pëlqen, por jam i detyruar. Nuk dua as të vjedh, as të vras, as të merrem me thashetheme, shoh punën time”, thotë ai.
