Dosja e Klement Balilit në policinë e shtetit dhe sistemin TIMS është e pastër.
ABC News ka arritur të kontrollojë dosjen personale të biznesmenit Balili, e cila ndodhet e regjistruar në mënyrë elektronike.
Nga këqyrja e këtyre të dhënave, në formën e kartelës personale, Balili rezulton i pastër dhe i pa shoqëruar ndonjëherë në Policinë e shtetit apo i proceduar penalisht.
Nuk dihet se kush ka ndërhyrë në këtë faqe, për të fshirë apo mos hedhur të dhënat e arrestimit të tij në korrik të 2006, ku është arrestuar së bashku me dy inspektorë policie për akuzën e trafikut të 750 kg drogë, por që më pas, akuzat ndaj tij janë pushuar me urdhër të prokurorisë.
Por pavarësisht pushimit të akuzave, në sistem duhet të ishte e regjistruar rasti i procedimit, arrestimit apo edhe pushimit. Për Balilin nuk figuron në kartelë edhe kallëzimi penal i Bashkisë së Sarandës për ndërtimin të paligjshëm të kompleksit turistik “Santa Quranta”, ku kompania e tij dhe ai vetë personalisht janë kallëzuar nga ish-kreu i bashkisë tashmë me detyrën e zv.ministrit të Brendshëm.
Por pavarësisht se është detyrim ligjor, që në këtë kartelë të evidentohen këto raste, për Klement Balilin nuk ka asnjë të dhënë për të kaluarën e tij penale. Ndryshe ndodh me shtetasit e tjerë shqiptarë, ku për çdo kallëzim, shoqërim apo informacion tjetër agjentët e policisë i hedhin në programin e sistemit TIMS.
Nga ana tjetër, ABC News ka mësuar se Klement Balili udhëtimin e fundit nga Shqipëria e ka bërë më 18 prill të këtij viti duke kaluar në orët e parë të mëngjesit në Kosovë nga ku është kthyer në darkë. Për të vazhduar po me një udhëtim brenda ditës më 10 prill po në Kosovë dhe me pas më 22 mars po të këtij viti ka kaluar në Malin e Zi, nëpërmjet pikës së kalimit kufitar të Muriqanit dhe është kthyer brenda ditës.
Por pavarësisht se nuk figuron që ka kaluar zyrtarisht me dokumentin e tij personal në pikat e kalimit kufitar të Shqipëri, Klement Balili për policinë është në arrati. Për këtë fakt, Policia e Shtetit në sistemin TIMS më datë 11 maj, ka hedhur në sistem emrin e Klement Balilit.
Duke njoftuar të gjithë pikat e kalimit kufitar, se nëse paraqitet ky shtetas për të dalë apo hyrë në territorin shqiptar të njoftohet shefi i kirimit të organizuar pranë Policisë së Shtetit. Ky njoftim, thuhet në kartelë, të bëhet për shkak se duhet të merret në pyetje për llogari të procedimit penal ku dyshohet se është përfshirë në trafikun ndërkombëtar të drogës.
Për këtë procedim, në Greqi janë arrestuar 13 shtetas grekë dhe dy shtetasit shqiptarë Petro Dalanaj dhe Kleanthi Palaj. Si pjesë e këtij rrjeti në Belgjikë janë arrestuar dy vëllezërit nga Kukësi, Dhimitër dhe Xhevahir Poti.
ABC News/d.i.
