Shqipëria duket se është përfshire në mënyrë direkte në procesin e përzgjedhjes se pasardhësit te Ban Ki Mun në postin e sekretarit të përgjithshëm të OKB-së. Burime diplomatiket theksojnë se Shqipërisë i është kërkuar të propozojë për postin e lartë emrin e bullgarës Kristalina Georgieva, aktualisht Komisionere për Buxhetin dhe Burimet Njerëzore në Bashkimin Europian. Por burime zyrtare nga Ministria e Jashtme, i kanë thënë Vizion Plus së Shqipëria, nuk do të bëjë një propozim të tillë dhe për më tepër, nuk do të ketë një kandidature. Emri i Georgieves është promovuar fort për postin e Sekretarit të Përgjithshëm të OKB-së nga ish-kreu i Komisionit Europian Barrozo, në një takim sekret të grupit të Bilderbergut në Dresdën në 9 qershor, ku kanë marrë pjesë edhe personalitete të tjera të BE-së, por jo vetëm. Por problemi kryesore është se Georgieva, nuk mbështetet nga vendi i saj Bullgaria, qe si kandidature zyrtare ka shpallur Irina Bokova-n, aktualisht në krye të Unesko-s.
Sipas portalit të Brukselit, “Euractiv”, vete Georgieva, pasi i është thënë nga kryeministri bullgar Borisov se nuk mund të kandidohej nga Sofja zyrtare, pasi ajo është me dosje, eurokomisionerja ka dërguar ish-eurodeputetin portugez Mario David si ndërmjetës, për të kontaktuar me qeverinë e Shqipërisë dhe atë të Hungarisë, si dy shtete potenciale që mund të pranojnë ta propozojnë si kandidature. Tani duket se pas refuzimit te Shqipërisë, do t’i mbetet Hungarisë të vendose nëse do ta propozojë apo jo Georgievën.
Një seancë e fundit dëgjimore me kandidaturat parashikohet të realizohet në 10 korrik. Deri atëherë, mbështetësit e Georgieves në Sofje, që janë njerëz të fondacionit “Soros”, po i bëjnë presion kryeministrit Borisov të tërheqë kandidaturën zyrtare të Bokoves, ndërsa paralelisht diplomatet që e mbështesin 62-vjeçaren bullgare po përpiqen të gjejnë një shtet tjetër të Europës Lindore, që do të bënte propozimin e saj, gjë që do të ishte një lëvizje e paprecedent, pasi nuk ka ndodhur me parë që një shtet të propozojë si kandidature një emër të një kombësie tjetër. Shqipëria këtë herë nuk do të ketë një kandidaturë të sajën për postin e Sekretarit të Përgjithshëm të OBK-se, ndërkohë që në të shkuarën është propozuar kryesisht emri i Ministrit të Jashtëm. /Vizion Plus/a.m.
